Градоначалникот Јакимовски: Само една зграда во Карпош ги исполнува безбедносните прописи
29/03/2025 11:25
Градоначалникот на општина Карпош, Стевчо Јакимовски, соопшти дека од извршената контрола на станбените објекти, рестораните и ноќните клубови во општината, само една од 800 згради ги исполнува сите законски прописи за безбедност. Од направената проверка се утврдило дека само една зграда, таа на Адора, е целосно усогласена со пропишаните стандарди, вклучувајќи противпожарни апарати, специјален систем за гасење на пожар и панични светла.
По проверката на 820 згради и 1.500 влезови во општина Карпош, 330 згради се пријавиле за контрола, а дополнителни 250 се јавиле за консултации. Сепак, градоначалникот Јакимовски нагласи дека, и покрај напорите на општинските служби, не добиваат соодветен повратен одговор од Дирекцијата за заштита и спасување (ДЗС), која според него е најодговорна за безбедноста на овие објекти.
Дополнително, општината продолжува со инспекција на локалите, како кафулиња, ресторани и ноќни клубови. Од извршените контроли на 110 објекти, 90 се усогласени со еколошките стандарди, додека на останатите 18 им се изработуваат елаборати, а еден објект е казнет за неисполнување на еколошките барања. Градоначалникот посочи дека се изречени 21 казна за локали кои не започнале со постапка за обновување на дозволата за работа.
Меѓутоа, два ноќни клубови, Пјур и Мош, одбиваат соработка со инспекторите, при што сопствениците на еден клуб ја изјавиле следната провокација: „Јас сум закон!“ Во однос на ова, Јакимовски истакна дека и покрај нивниот отпор, општината ќе продолжи со постапката и ќе го принуди исполнувањето на законските прописи.
Се очекува дека, со новиот Закон за локална самоуправа, општината ќе има поголема контрола врз издавањето дозволи за градба и летни тераси, за да се избегнат конфликти помеѓу различните надлежни органи и граѓаните.
