Шест месеци власт, рејтингот на Трамп вртоглаво паѓа
21/07/2025 11:55
Шест месеци по почетокот на вториот мандат на Доналд Трамп како претседател на САД, неговиот рејтинг опаѓа, а расте поделбата меѓу неговите лојални поддржувачи и пошироката јавност. Според нова анкета на CBS News/YouGov, сè повеќе Американци ја губат довербата во неговата политика за депортација, а приоритет им стануваат инфлацијата и растот на животните трошоци.
Иако Трамп успеа да реализира неколку клучни законски реформи, вклучувајќи го и Законот „Еден голем прекрасен пакет“ (One Big Beautiful Bill Act), многумина го перцепираат како мерка што им користи претежно на богатите. Поддршката за неговата програма за депортација, која на почетокот уживаше широка поддршка, сега е значително намалена. Испитаниците се незадоволни од тоа што фокусот не е ставен на криминалците, туку на пошироката имигрантска популација, особено врз Хиспаноамериканците.
Програмата денес добива главна поддршка само од републиканците и симпатизерите на МАГА движењето. За споредба, половина од Хиспаноамериканците го поддржувале Трамп во јануари 2025 година, но сега тој број е намален на една третина.
Во економската сфера, дури 70% од Американците сметаат дека администрацијата не презема доволно мерки против растот на цените. Околу две третини од анкетираните се незадоволни од справувањето со инфлацијата – највисоко ниво на незадоволство досега. За првпат, голем дел од гласачите сметаат дека Трамп претерано се фокусира на кратење на државната потрошувачка, што, според нив, негативно се одразува на средната и работничката класа.
Иако дел од граѓаните сè уште веруваат дека Трамп ги исполнува ветувањата, тој тренд е во опаѓање – особено меѓу независните и демократските гласачи.
Кога станува збор за каматните стапки, јавноста е поделена – едни сметаат дека треба да останат високи за борба против инфлацијата, а други би сакале нивно намалување за полесно задолжување. Сепак, постои силна поддршка за независноста на Федералните резерви од извршната власт.
Законот „Еден голем прекрасен пакет“ не наиде на поддршка кај мнозинството – шест од десет Американци го отфрлаат, сметајќи дека придобивките се исклучиво за богатите. Многумина се уште не се доволно информирани за неговата содржина, а ставовите за него се остро поделени по партиски линии.
Во однос на аферата со Џефри Епстајн, само 11% од гласачите велат дека таа влијае на нивното мислење за администрацијата на Трамп. Сепак, и меѓу симпатизерите на МАГА постои барање за целосна транспарентност и објавување на сите поврзани документи, за кои јавноста верува дека содржат чувствителни информации за моќни луѓе. Иако аферата не е во фокусот на базата, се забележува одредено незадоволство од начинот на кој претседателот се справува со прашањето.
Поддршката за Трамп сега изнесува околу 40% – слично како во текот на најголемиот дел од неговиот прв мандат – што е пад во споредба со почетокот на вториот мандат, кога таа беше над 50%. Најголема поддршка сè уште добива од републиканците и МАГА гласачите, додека останатите групи покажуваат сè поголем скептицизам.
Шест месеци по почетокот на вториот мандат на Доналд Трамп како претседател на САД, неговиот рејтинг опаѓа, а расте поделбата меѓу неговите лојални поддржувачи и пошироката јавност. Според нова анкета на CBS News/YouGov, сè повеќе Американци ја губат довербата во неговата политика за депортација, а приоритет им стануваат инфлацијата и растот на животните трошоци.
