18 години по култната „Итно ми требаш“, Јован Јованов и Тони Зен ја снимија „Уште ми требаш“

Јован Јованов и Тони Зен со „Уште ми требаш“ се враќаат 18 години по култната песна „Итно ми требаш“, која во 2008 година ја снимија заедно со Ламбе Алабаковски.

Новата песна ќе биде премиерно изведена на 31 октомври на годинашното издание на „Макфест 2026“, а авторите ја најавуваат како продолжение на приказната што започна пред речиси две децении.

Од „Итно ми требаш“ до „Уште ми требаш“

Според Јован Јованов, новата песна не е обид да се повтори успехот на стариот хит, туку да се продолжи приказната со поинаква емоција и од временска дистанца од 18 години.

„Некои песни не можат да се повторат, но некои приказни заслужуваат да продолжат“, вели Јованов.

Тој објаснува дека „Итно ми требаш“ била приказна за незаборавна ноќ, излегување во клуб и моментална привлечност меѓу двајца луѓе.

„Уште ми требаш“, пак, ја раскажува истата приказна од друга перспектива – кога минале годините, но спомените и чувствата не исчезнале.

„Веќе не се работи за провод, туку за чувства што останале“

Јованов вели дека токму временската дистанца е суштината на новата песна.

„Се работи за спомен кој не е избледен, едно убаво сеќавање. Целта на приказната е тоа што се случува сега. Затоа и текстот е поемотивен. Веќе не се работи за провод, се работи за чувства што останале“, вели тој.

Премиерата на „Макфест“

„Уште ми требаш“ премиерно ќе биде изведена во сабота, на 31 октомври, на сцената на „Макфест“.

По фестивалската премиера е најавена и официјална промоција на видеоспотот за песната.

Музиката е дело на Јован Јованов, текстот го потпишуваат Јованов и Тони Зен, додека за продукцијата се задолжени Јован и Иван Јованов.

Јован Јованов и Тони Зен со „Уште ми требаш“ по 18 години повторно ја отвораат приказната од еден од најпрепознатливите македонски поп-хитови од тој период, овојпат со позрела и поемотивна порака.

Share on Facebook

Tweet

Follow us

Save