Осумнаесет лица повредени во пожарот во фабриката „Макпрогрес“ во Виница
07/09/2025 11:43
Вкупно 18 лица се примени во кочанската Општа болница поради повреди здобиени во големиот пожар што избувна вчера доцна попладне во фабриката за кондиторски производи „Макпрогрес“ во Виница.
Според д-р Оливера Цимбаљевиќ, раководител на одделението за анестезиологија и реанимација, дел од повредените се задржани во Кочани, а дел се препратени во Скопје. „Сите се во стабилна состојба,“ изјави таа за МИА.
Состојба на повредените
Петмина се згрижени на хируршкото одделение – четворица со изгореници на нозете од прв и втор степен, еден со инхалациони повреди.
Петмина се сместени на интерното одделение со токсиколошки повреди од вдишување чад.
Шест лица веднаш се препратени во клиниките во Скопје, сите со симптоми на труење од чад.
Преостанатите пациенти по лекарската интервенција биле пуштени дома.
Сè уште не е прецизирано колку од повредените се пожарникари, а колку работници во „Макпрогрес“.
Пожарот
Пожарот избувна вчера во 18:40 часот во магацините и производствените погони 6, 7 и 8 на фабриката. Во неговото гаснење учествуваа екипи од ТППЕ Виница и противпожарни единици од повеќе соседни општини.
Вкупно 18 лица се примени во кочанската Општа болница поради повреди здобиени во големиот пожар што избувна вчера доцна попладне во фабриката за кондиторски производи „Макпрогрес“ во Виница.
