МВР поднесе кривична пријава против Оливер Спасовски за злоупотреба на службена положба
10/12/2025 13:26
Поранешниот министер за внатрешни работи и сегашен пратеник на СДСМ, Оливер Спасовски, се соочува со нова кривична постапка. Министерството за внатрешни работи, каде што долги години ја извршуваше функцијата прв човек, поднесе пријава до Основното јавно обвинителство Скопје.
Пријавата, подготвена од Одделот за сузбивање на организиран и сериозен криминал, го товари Спасовски за „злоупотреба на службена положба и овластување“ според член 353 став 4 во врска со став 1 од Кривичниот законик.
Според информациите на МВР, во 2021 година Спасовски наводно ја искористил службената функција за да му овозможи на правен субјект – станица за технички преглед во општина Сарај – да оствари противправна имотна корист од 5.565.927 денари.
Суштината на обвинението е дека како министер намерно не постапил во законски предвидениот рок. До него бил доставен предлог за одземање овластување на станицата за технички преглед, но решение не било донесено во рок од 15 дена, како што пропишуваат Законот за возила и соодветниот правилник.
Поради тоа, станицата продолжила да работи и во тој период, а според пријавата, токму тогаш ја остварила спорната добивка од над 5,5 милиони денари – сума која МВР ја смета за противправна корист.
Обвинителството треба да го разгледа предметот и да одлучи за понатамошните чекори.
