САД почна со евакуација на персоналот од Кипар, Јордан и Пакистан
04/03/2026 10:02
Американскиот Стејт департмент ги овласти службениците на американската влада кои не се вклучени во итни задачи, како и членовите на нивните семејства, доброволно да го напуштат Кипар поради конфликтот поврзан со Иран.
Мерката е донесена поради ограничените можности на Амбасадата на САД во Никозија да им обезбеди помош на американските државјани во услови на потенцијална ескалација.
Засолништа во Јордан, евакуација од Пакистан
Во исто време, Амбасадата на САД во Јордан ги откажа сите закажани состаноци и им наложи на вработените и американските државјани да побараат засолниште. Патничкиот совет за Јордан е подигнат на ниво „преиспитајте го патувањето“, поради ризици од тероризам и вооружен конфликт.
Стејт департментот нареди и персоналот што не е неопходен во конзулатите во Карачи и Лахор, во Пакистан, да ја напушти земјата заедно со своите семејства.
Протести и жртви во Карачи
Одлуката следува по насилните протести во Карачи, при кои, според медиумски извештаи, загинале 10 лица, а околу 60 биле повредени, откако демонстранти се обиделе да упаднат во американскиот конзулат по убиството на иранскиот врховен лидер Али Хамнеи, пренесе Ал Џезира.
Евакуационите мерки се дел од пошироките безбедносни проценки на Вашингтон во услови на зголемена нестабилност на Блискиот Исток и во регионот на Персискиот Залив.
