Истрага за група поврзана со палење синагога во Скопје
16/04/2026 14:34
Бугарскиот телеграм канал „De re Militari“ објави дека новоформираната организација „Харакат Асхаб ал-Јамин ал-Исламија“ (HAYI) е под сериозна истрага поради сомнежи за поврзаност со Иран и вмешаност во серија антисемитски напади низ Европа, објави порталот ВЕСТИМАК.мк.
Според информациите на кои се повикува бугарскиот канал, групата презела одговорност за повеќе инциденти во текот на март и април 2026 година, меѓу кои и палењето на синагога и центар на еврејската заедница во Скопје.
Нападот во главниот град на Македонија се случил за време на велигденскиот викенд, кога биле таргетирани верски и заеднички објекти.
За организацијата HAYI:
„Харакат Асхаб ал-Јамин“ се појавила на почетокот на март и претходно не била регистрирана во безбедносните извештаи. Аналитичарите, според објавата, сметаат дека станува збор за т.н. „прикривачка група“, која функционира како параван зад кој може да стојат други структури.
Според истите извори, во одредени случаи групата ангажира локални криминални лица или мрежи поврзани со проирански организации за извршување на палежи, вандализам и други насилни акции.
Истрагата за организацијата HAYI и нејзината вмешаност во нападот во Скопје е во тек. Редакцијата на МК Информер внимателно го следи развојот на случајот и очекува официјални информации од надлежните безбедносни институции во Македонија.
