Огромен астероид со брзина од 32000 км/ч се приближува кон Земјата
17/05/2026 14:12
Астероид со големина на кит се движи кон Земјата: Утре прелетува поблиску од сателитите
32.000 километри на час
Масивен, досега неоткриен астероид се движи кон Земјата со брзина од околу 32.000 километри на час и утре (18 мај) ќе прелета покрај нашата планета на растојание поблиско од орбитите на некои сателити, пренесува „LiveScience“.
Ова несекојдневно блиско среќавање ќе може да се следи онлајн, дури и за оние кои немаат професионална опрема за набљудување на ѕвездите.
Откриен на 10 мај
Астероидот, именуван како 2026 JH2, беше откриен неодамна, на 10 мај, од страна на астрономите во опсерваторијата „Маунт Лемон“ во близина на Тусон, Аризона.
Според податоците од Лабораторијата за млазен погон на НАСА, оваа вселенска карпа кружи околу Сонцето на секои 3,7 години по елиптична патека која се протега дури до Јупитер.
Големина на син кит
Со дијаметар од околу 35 метри, овој астероид е со големина на син кит – најголемото животно на Земјата. Тоа го става во иста категорија со познатиот метеор од Чељабинск, кој спектакуларно експлодираше над Русија во 2013 година.
На 91.000 километри од Земјата
Во понеделник навечер, околу 23:00 часот по македонско време, астероидот 2026 JH2 ќе прелета над површината на Земјата на висина од околу 91.000 километри.
Ова растојание претставува само една четвртина од оддалеченоста помеѓу нашата планета и Месечината. На оваа висина, карпата ќе помине над повеќето сателити во Земјината орбита.
Нема опасност од судир
Научниците нагласуваат дека нема никаков ризик од судир. Шансите за удар во Земјата се еднакви на нула.
Како да се гледа прелетот?
За време на најблискиот пристап, астероидот ќе достигне светлина од 11,5 степени, што го прави лесно видлив со добар телескоп или поквалитетен двоглед.
За сите останати, проектот „Виртуелен телескоп“ (Virtual Telescope Project) на астрономот Џанлука Маси ќе обезбеди бесплатен видеопренос во живо од прелетувањето следено преку телескоп во Манчијано, Италија.
