Судири во Лондон по победата на Франција над Мароко
Повреден полицаец, интервенирале единици за разбивање немири
Додека во Париз прославата по победата на Франција над Мароко со 2:0 помина без поголеми инциденти, во Лондон избувнаа судири меѓу дел од навивачите и полицијата по завршувањето на натпреварот.
Според британските медиуми, најсериозните инциденти биле регистрирани во областа Еџвер Роуд во западен Лондон, каде живее бројна мароканска заедница. За воспоставување ред на терен биле распоредени специјални полициски единици за справување со немири.
Еден полицаец е повреден
Британските медиуми јавуваат дека во судирите е повреден еден припадник на Метрополитенската полиција.
На снимките објавени на социјалните мрежи се гледа како повредениот полицаец добива медицинска помош од екипи на итната служба, додека десетици негови колеги со заштитна опрема обезбедуваат безбедносен кордон околу местото на настанот.
Тензиите започнале уште на полувремето
Според извештаите, првите собири започнале уште за време на полувремето, кога биле активирани огномети, а дел од навивачите го блокирале сообраќајот, носејќи и вејќи марокански знамиња.
По последниот судиски свиреж атмосферата дополнително се вжештила, по што дошло до судири со полицијата.
Париз под силно обезбедување, но без поголеми инциденти
За разлика од Лондон, прославата во Париз поминала претежно мирно, иако француските власти презеле обемни безбедносни мерки.
Низ Франција биле ангажирани повеќе од 20.000 полицајци и жандарми, од кои околу 8.000 во Париз, поради стравувања од можни нереди по натпреварот.
