Владата објави нови огласи за вработување, се бараат кандидати за 18 позиции

Владата на Македонија објави нови огласи за вработување за 18 различни работни позиции.

Огласите доаѓаат во период кога во јавноста со месеци се зборуваше за вишок вработени во државните институции и за потреба од намалување на администрацијата.

Сепак, огласите за нови вработувања не стивнуваат.

Плати од 29.000 до 38.000 денари

Според објавените огласи, платите за различните позиции се движат од околу 29.000 до 38.000 денари.

За дел од работните места се предвидува ангажирање на повеќе од едно лице.

Меѓу позициите за кои се бараат кандидати се самостоен референт за контрола на материјално-финансиски документи, самостоен референт за услуги со фиксна и мобилна телефонија и самостоен референт за ликвидатура за обработка на финансиско-материјални документи.

Се бара и самостоен референт за набавка на прехранбени производи и пијалаци.

За овие позиции платата изнесува 29.669 денари.

Позиции со нешто повисоки плати

Малку повисока плата е предвидена за позицијата помлад соработник за сајбер безбедност во Одделението за информатичка технологија и поддршка.

Платата за ова работно место изнесува 32.012 денари.

Иста плата е предвидена и за помлад соработник за контрола на набавките на стоки, услуги и работи по договори.

Со ист износ е и позицијата помлад соработник за собирање и анализа на податоци за подготовка на евиденции и извештаи.

Највисоки плати за советнички позиции

Меѓу највисоко платените позиции на овие огласи се советник за финансиско-материјално работење, советник за вработување и советник за внатрешна ревизија.

За овие работни места е предвидена плата од 38.222 денари.

Повеќе детали за позициите, условите и роковите за пријавување се објавени на веб-страницата на Агенцијата за администрација.

Услови за кандидатите

Условите за пријавување се слични како и кај поголем дел од огласите за државна администрација.

Кандидатите треба да бидат државјани на Македонија, активно да го користат македонскиот јазик, да бидат полнолетни, здравствено способни и да немаат судска забрана за вршење професија.

Дополнително, се бара активно познавање на компјутерски програми за канцелариско работење.

За дел од позициите се бара и положен испит за административно управување, познавање на англиски, француски или германски јазик, како и положен правосуден испит.

Потребно е високо образование, а за дел од позициите работното искуство не е задолжително.

За други позиции, пак, искуство се бара како услов.

Нови вработувања и покрај најавите за намалување

По изборите се забележува раст на огласите за вработување во државните институции.

Покрај огласите во основни училишта и општини, кандидати се бараат и за повеќе државни институции.

Меѓу нив се Фискалниот совет, НБРСМ, Собранието, Министерството за транспорт, Управата за јавни приходи, Министерството за финансии и Генералниот секретаријат на Владата.

Фактор објави дека според последниот извештај на Агенцијата за администрација е забележан остар раст на одлуките за избор на нови административци во 2025 година.

Според тие податоци, бројот на избрани кандидати за една година е зголемен за 132,62 отсто.

Прашањето за администрацијата останува отворено

Она што останува отворено прашање е како новите огласи се вклопуваат со претходните најави за намалување на државната администрација.

Пред промената на власта, ова беше една од почесто споменуваните теми во јавноста.

Дополнително, точниот број на вработени во администрацијата не е јавно објавен, иако често се посочуваше дека во јавниот сектор има превработеност.

Роковите за пријавување за дел од огласите истекуваат деновиве, додека за други ќе траат и во наредните десетина дена.