Зголемен ризик од удар: Астероидот 2024 YR4 предизвикува загриженост кај светските вселенски агенции

Светските вселенски агенции донесоа вонредна одлука поради зголемениот ризик од удар на Земјата од астероидот 2024 YR4, кој би можел да предизвика големи штети на голем град, пренесува „Дејли Мејл“.

Според најновите пресметки на астрономите, шансите за судир на астероидот 2024 YR4 со Земјата во 2032 година се 2,3%. Европската вселенска агенција доби вонреден пристап до вселенскиот телескоп Џејмс Веб за да изврши прецизни мерења на големината на астероидот.

Астрономите ќе го користат JWST за да ја одредат точната големина на астероидот 2024 YR4 и да ги финализираат пресметките на неговата орбита. Според најновите проценки, астероидот има дијаметар до 90 метри, што го прави сличен по големина со Статуата на слободата во Њујорк или Биг Бен во Лондон.

Ако се случи судир, ударот на астероидот би бил сличен на оној на Тунгускиот астероид во 1908 година, кој уништи голема површина од 2.150 квадратни километри во Сибир.

Причината за оваа вонредна одлука е дека најдобрите телескопи на Земјата мораат да набљудуваат објекти преку Земјината атмосфера, што ги искривува светлинските зраци и го прави потешко добивањето точни слики. Џејмс Веб, кој е над атмосферата, ќе може да ги избегне овие пречки и да собере прецизни податоци преку инфрацрвени сензори, следејќи ја топлината што се зрачи од астероидот.

Овие информации ќе им помогнат на агенциите за планетарна одбрана да изготват стратегии за заштита и да решат дали ќе биде потребно да преземат акции за да го избегнат потенцијалниот удар.

Астероидот 2024 YR4 беше забележан за првпат крајот на декември минатата година од NASA-овата станица Asteroid Terrestrial-impact Last Alert System во Чиле. Дури и со проценетата веројатност за удар од само 1,3% во тоа време, астероидот беше идентификуван како најголемата закана за Земјата и се нашол на врвот на листите за ризик на NASA и ESA.

Со проценет дијаметар до 90 метри, ако астероидот удри во Земјата, последиците би биле големи. Сепак, раните проценки за големината на астероидот може да се покажат неточни. ESA истакнува дека сите собрани податоци за астероидот 2024 YR4 ќе бидат достапни за јавноста.