Кина подготвена за конструктивна улога во политичко решение за Украина

Кина повторно ја истакна својата подготвеност да придонесе за мирно и одржливо решение на украинската криза. Портпаролката на кинеското Министерство за надворешни работи, Мао Нинг, нагласи дека сите страни треба да работат на политичко решение засновано врз заедничка и трајна безбедност.

„Кина секогаш се залага за објективен и правичен пристап во однос на украинското прашање, што е јасно видливо за сите засегнати страни. Подготвени сме да имаме конструктивна улога во процесот на изнаоѓање решение“, изјави Мао, коментирајќи ги изјавите на украинскиот претседател Володимир Зеленски.

Претходно, рускиот шеф на дипломатијата Сергеј Лавров оцени дека Кина, заедно со Русија, САД, Велика Британија и Франција, може да обезбеди безбедносни гаранции за Украина.

Во меѓувреме, меѓународните дипломатски напори продолжуваат. Американскиот претседател Доналд Трамп во понеделник се сретна со Зеленски во Белата куќа, а потоа и со лидерите на Европската Унија кои изразија поддршка за Киев. Разговорот меѓу Трамп и Зеленски траеше еден час, по што американскиот претседател оствари и телефонски разговор со рускиот лидер Владимир Путин.

Двајцата претседатели разговараа 40 минути за можноста од трилатерална средба со Зеленски и изразија поддршка за продолжување на директните консултации меѓу Москва и Киев.

Позитивен сигнал за можноста од дипломатско решение пристигна и од последната средба меѓу Путин и Трамп на 15 август во Алјаска. Двајцата лидери оценија дека состанокот бил продуктивен, а Путин изрази уверување дека постои реална перспектива за крај на конфликтот и воспоставување долгорочен мир.

Share on Facebook

Tweet

Follow us

Save