Пицоло: Кина ја користи меката моќ за да го зацврсти влијанието на Западен Балкан
26/09/2025 11:43
Кина сè поагресивно ја демонстрира својата „мека моќ“ на Западен Балкан преку комбинација на политички и економски алатки, покажува анализата на францускиот истражувач Пјер Пицоло.
Според него, Пекинг се позиционира како значаен играч во регионот, нудејќи инвестиции и поддршка преку различни форми на соработка. Од вакцини и медицинска помош во време на пандемијата, преку донации на безбедносни камери, па сè до организирање на заеднички воени вежби – Кина умешно ги комбинира симболичните и практичните потези за да изгради влијание врз локалните влади и општеството.
Пицоло предупредува дека оваа стратегија е внимателно осмислена: „Кина не настапува агресивно, туку со тивка дипломатија, оставајќи впечаток на партнер кој е подготвен да помогне таму каде што Европа или САД заостануваат.“
Според анализата, целта на Пекинг е двојна: да ја зголеми својата видливост во регионот и да ја претстави Кина како алтернативен центар на моќ, способен да им понуди на државите од Балканот нови економски и политички перспективи.
Сепак, ова влијание отвора и прашања за безбедноста и независноста на регионот, особено во контекст на стратешките инфраструктурни проекти и зголемената технолошка зависност.
