Сторија на Ројтерс: Како војната ги уништи младите на Украина
01/12/2025 17:11
Ројтерс објави потресна сторија со сведоштва на неколку украинци кои учествувале на фронтот со Русија, ниту еден не е постар од 24 години. Иако се приклучиле оваа пролет во март, тие веќе се надвор од бојното поле, воени ветерани, со тешки последици.
Украинската војска се соочува со сериозна човечка криза, додека сè поголем број млади доброволци, мотивирани од патриотизам и високи финансиски бонуси, заминуваат на линијата на фронт – но за многумина тоа завршува трагично. Приказната на 20-годишниот Павло Брошков е само една од стотици слични: само три месеци по приклучувањето кон армијата, тој беше тешко ранет на боиштето во Донецк, каде доживеа речиси сигурна смрт кога руски дрон се подготвуваше да го нападне. „Стравот беше дека повеќе нема да ја видам семејството, не дека ќе умрам“, раскажува младиот војник од болницата во Одеса.
Од групата од единаесет млади регрути со кои Брошков тренирал во пролетта, ниту еден повеќе не се наоѓа на фронтот: четворица се ранети, тројца исчезнати, двајца дезертирале, еден се разболел, а еден извршил самоубиство. Судбините на овие војници ја отсликуваат суровата реалност на украинската армија, која по речиси четири години жестоки борби бележи тешки загуби и хроничен недостиг на свеж кадар.
Еден од исчезнатите е и најдобриот пријател на Брошков — 25-годишниот Евген Јушченко — за кого семејството очајно бара информации, стравувајќи дека е мртов или заробен. „Одбивам да поверувам дека е загинат“, вели неговата сестра.
Украинската војска се обидуваше да ја зајакне борбената сила преку национална кампања за регрутирање млади лица, нудејќи плати до 2.900 долари месечно, бонус од 24.000 долари и безкаматни хипотеки. Но, суровата реалност на фронтот — смртоносни дронови, артилериски напади, дефицит на искусен кадар и интензивни руски офанзиви — брзо ги руши очекувањата на регрутите.
Брошков и неговите соборци ја опишуваат првата борбена линија како место каде „мириса на барут и на смрт“. Некои, како 23-годишниот „Кузма“, се спасени во последен момент, но остануваат трајно обележани од раните и психолошките последици.
Додека САД и Украина водат интензивни мировни разговори, загубите меѓу најмладите војници го откриваат огромниот човечки данок што го плаќа Киев. Иако Брошков се врати кај семејството, борбата ја носи со себе: „Имам 20 години и едвај го видов животот, но војував за мојата земја. Повторно би го направил истото.“
