Екипа на CNN соопшти дека рано утринава била сведок на неколку силни експлозии во главниот град на Венецуела, по што делови од Каракас останале без електрична енергија.
Според информациите на телевизијата, првата експлозија била регистрирана околу 1:50 часот по локално време. Дописничката на CNN на терен изјавила дека детонацијата била исклучително силна и предизвикала тресење на прозорците во објектите во кои се наоѓала екипата.
По експлозиите, новинарите забележале прекин на електричната енергија во повеќе делови од градот, како и звук на авиони што се движеле над венецуелската престолнина.
Локалните медиуми „Efecto Cocuyo“ и „Tal Cual Digital“ објавија дека експлозии биле слушнати и во северната крајбрежна држава Ла Гваира, како и во Игероте, град во државата Миранда, што укажува на поширок безбедносен инцидент.
Засега нема официјални информации од венецуелските власти за причините за експлозиите, ниту за евентуални жртви или материјална штета.
Инцидентот се случува во чувствителен геополитички контекст, откако американскиот претседател Доналд Трамп во изминатиот период повеќепати изјави дека САД разгледуваат нови мерки против, како што ги нарекува, мрежите за трговија со дрога во Венецуела, најавувајќи можни операции во блиска иднина.
Состојбата во Каракас и пошироко внимателно се следи, а јавноста очекува официјални соопштенија од надлежните институции.
