Трамп: САД ќе ја водат Венецуела до транзиција американски компании влегуваат во нафтениот сектор
03/01/2026 20:00
Американскиот претседател Доналд Трамп изјави дека Соединетите Американски Држави ќе ја „водат Венецуела сè додека не дојде до вистинска транзиција“, коментирајќи ја денешната воена операција во Каракас и апсењето на венецуелскиот претседател Николас Мадуро.
Трамп истакна дека американските нафтени компании ќе започнат активности во Венецуела, нагласувајќи дека станува збор за најголемите енергетски корпорации во светот.
„Нашите нафтени компании ќе влезат, ќе инвестираат милијарди долари, ќе ја обноват сериозно оштетената нафтена и енергетска инфраструктура и ќе почнат да создаваат приходи за земјата“, изјави Трамп.
Според него, американските сили веќе се присутни на терен и ќе останат во земјата сè додека не се создадат услови за, како што рече, соодветна и стабилна политичка транзиција. Трамп нагласи дека Вашингтон нема да дозволи повторување на сценарија од минатото, во кои „се менуваа луѓе на власт, но проблемите остануваа исти“.
„Вонредна воена операција“ во Каракас
Американскиот претседател откри дека по негова директна наредба, вооружените сили на Соединетите Американски Држави доцна синоќа и во текот на денот спровеле, како што ја нарече, „вонредна воена операција“ во венецуелската престолнина Каракас.
„Воздушна, копнена и поморска моќ беа употребени во спектакуларен напад каков што не е виден од Втората светска војна“, изјави Трамп, додавајќи дека целта била „силно утврдената воена тврдина во срцето на Каракас“.
Според него, операцијата имала за цел апсење на, како што го нарече, „одметнатиот диктатор“ Николас Мадуро и негово изведување пред лицето на правдата.
Мадуро и сопругата ќе се соочат со обвиненија во САД
Трамп, повикувајќи се на информации објавени од Sky News, оцени дека операцијата претставува „еден од најимпресивните, најефикасните и најмоќните прикази на американската воена моќ во историјата на САД“.
Американските власти соопштија дека Мадуро и неговата сопруга Силија Флорес се заробени и изнесени од земјата. Нападите биле насочени кон воени цели, но и кон цивилни објекти и пристаништето во Каракас.
Венецуелските власти информираат дека има жртви, а бројот сè уште се утврдува.
Претходно денес, главната обвинителка на САД Пам Бонди изјави дека против брачниот пар Мадуро е поднесено обвинение од федерален суд во Њујорк и дека тие ќе се соочат со кривична постапка.
