Унгарија и Словачка ќе ја тужат ЕУ поради целосната забрана за увоз на руски гас
26/01/2026 21:52
Унгарија и Словачка најавија тужба против Европската унија поради одлуката за целосна забрана на увозот на руски гас. Тужбата ќе биде поднесена веднаш штом законот официјално стапи во сила, соопштија министрите за надворешни работи на двете земји.
Унгарскиот министер за надворешни работи Петер Сијарто изјави дека Будимпешта ќе ги искористи „сите правни средства“ за поништување на забраната, оценувајќи дека таа е спротивна на националните интереси на Унгарија и дека ќе предизвика значително зголемување на трошоците за енергија за унгарските домаќинства.
Лидерите на ЕУ во декември се договорија целосно да ја забранат куповината на гас од руски извозници до крајот на 2027 година, додека слична забрана за увоз на руска нафта се очекува подоцна во текот на оваа година. Законот за гас веќе е усвоен, но Унгарија и Словачка гласаа против, бидејќи двете земји во голема мера зависат од руските фосилни горива.
Сијарто најави дека Унгарија ќе ја покрене постапката веднаш по стапувањето на законот во сила, што се очекува на почетокот на февруари, и ова е првпат да наведе конкретен рок, иако и претходно повеќепати се закануваше со тужба.
Тој ја обвини ЕУ дека употребила „правен трик“, квалификувајќи ја забраната како трговска мерка, а не како санкција – со што се избегнува потребата од едногласна поддршка од сите земји членки.
И Словачка ќе поднесе тужба против Европската унија, потврди словачкиот министер за надворешни работи Јурај Бланар, иако не прецизираше точен датум.
„Не можеме да прифатиме решенија кои не ги одразуваат реалните капацитети и специфичните околности на поединечните земји“, изјави Бланар.
Унгарија и Словачка најавија тужба против Европската унија поради одлуката за целосна забрана на увозот на руски гас. Тужбата ќе биде поднесена веднаш штом законот официјално стапи во сила, соопштија министрите за надворешни работи на двете земји.
