По новите израелски напади аеродромот во Техеран во пламен
07/03/2026 9:34
Аеродром во Техеран се најде во пламен рано утринава, откако нов бран силни експлозии го потресе иранскиот главен град.
Нападите се случуваат на осмиот ден од воената операција на САД и Израел против Иран. Израелската армија соопшти дека започнала нова серија масовни удари врз цели во Техеран.
„ИДФ започна напад од голем обем врз цели во Техеран“, соопшти израелската војска, додавајќи дека операцијата претставува одговор на иранските ракети испратени кон Израел.
Снимки објавени на социјалните мрежи покажуваат силни експлозии и густ чад што се издига над западниот дел на градот. Воедно, пожар избувнал и на еден од аеродромите во иранската престолнина.
Во меѓувреме, американските власти предупредуваат дека најголемата бомбашка кампања во досегашниот тек на конфликтот можеби допрва следи.
Ескалацијата на војната веќе има и сериозни економски последици. Само една недела по почетокот на конфликтот на Блискиот Исток, цените на нафтата на светските пазари пораснаа за околу 30 проценти, достигнувајќи ниво кое не е забележано од 2023 година.
Меѓународната заедница предупредува дека ситуацијата во регионот останува исклучително напната и дека натамошната ескалација може дополнително да ја дестабилизира глобалната безбедност и енергетските пазари.
