Трамп прогласи победа над Иран: „Во првиот час беше завршено“
12/03/2026 10:42
Американскиот претседател Доналд Трамп изјави дека САД извојувале победа во конфликтот со Иран, порачувајќи дека исходот бил јасен уште во самиот почеток на операциите.
Говорејќи на настан во рамки на кампања во Хеброн, Кентаки, Трамп рече дека не треба прерано да се прогласува победа, но додаде дека, според него, САД веќе ја постигнале целта.
„Никогаш не е добра идеја да се каже прерано дека сте победиле. Ние победивме. Во првиот час, заврши“, изјави Трамп, додавајќи дека американската војска уништила 58 ирански воени бродови.
Во исто време, тој испрати порака дека Вашингтон нема намера пребрзо да се повлече од конфликтот. Според Трамп, САД не смеат да заминат пред да го завршат она што го започнале.
„Не сакаме да си одиме предвреме, нели? Мора да го завршиме она што го започнавме“, рече американскиот претседател, оценувајќи дека Иран е сериозно ослабен.
Трамп порача и дека САД немаат намера да се враќаат на сличен конфликт на секои две години, со што индиректно најави продолжување на притисокот врз Техеран.
Покрај воените пораки, американскиот претседател се осврна и на енергетската состојба, најавувајќи дека ќе има мало намалување на стратешките резерви на нафта.
Тој истакна дека одлуката на Меѓународната агенција за енергетика за координирано ослободување на 400 милиони барели нафта од националните резерви ширум светот ќе влијае врз намалување на цените на нафтата.
„Со задоволство објавувам дека претходно денеска Меѓународната агенција за енергетика се согласи да координира ослободување на рекордни 400 милиони барели нафта од различни национални резерви на нафта низ целиот свет, што ќе доведе до значително намалување на цените на нафтата“, изјави Трамп.
Со овие пораки, Трамп испрати двоен сигнал, дека САД сметаат оти имаат воена предност во судирот со Иран, но и дека паралелно се обидуваат да го намалат економскиот удар врз глобалниот енергетски пазар.
