Мицкоски: Почеток на реализација на Брза пруга во 2027

Мицкоски: Брза пруга од Кичево до Бугарија до 2029-2030 година

Владата доби необврзувачка индикативна понуда од потенцијален финансиер

Премиерот Христијан Мицкоски денеска соопшти дека проектот „Брза пруга“ на Коридорот 10 постепено влегува во понапредна фаза на реализација. Според него, Владата веќе располага со необврзувачка индикативна понуда од потенцијален понудувач на меѓународниот повик за финансиери на овој стратешки проект.

„Имаме необврзувачка индикативна понуда од потенцијален најдобар понудувач. Треба, се разбира, да ги потврдат условите што тогаш ги дадоа. И ако биде сè како што треба, очекувам веќе почетокот на следната година да отпочне реализацијата на овој проект“, изјави Мицкоски.

Студиите при крај, ревизија до летото

Премиерот информираше дека физибилити студијата и студијата за влијание врз животната средина се веќе при крај. Законот предвидува рок од 270 дена, а Мицкоски очекува дека до јуни или јули комплетно ќе бидат затворени сите прашања, по што следи ревизија на студиите.

По завршувањето на овие процедури, Владата ќе влезе во процес на потпишување договор со потенцијален финансиер.

Напредок и на Коридорот 8

Премиерот се осврна и на реализацијата на Коридорот 8, истакнувајќи дека проектот продолжува со несмалена динамика.

„Во тек е секција од делницата Куманово – Граничен премин кон Бугарија. Се проби последниот тунел од втората секција, а првата до Бељаковце е веќе пуштена.“

Мицкоски додаде дека се преговара со Европската комисија за модернизација на пругата од Скопје до Кичево, при што парите се веќе обезбедени во рамките на „Планот за раст“. Проектот предвидува електрификација и промена на шините на оваа делница.

Целосно заокружување до 2029-2030 година

Премиерот изрази очекување дека комплетната железничка инфраструктура од Кичево до границата со Бугарија ќе биде заокружена најдоцна до 2029-2030 година.

Со ова, Македонија значително ќе го подобри железничкиот сообраќај и ќе се поврзе побрзо со европската мрежа, што е од клучно значење за економскиот развој и за транспортните коридори.