Со 124 гласа „за“ изгласана владата на Румен Радев во Бугарија
08/05/2026 11:54
52-то Народно собрание ја изгласа структурата, составот и премиерот на новиот Совет на министри, предводен од Румен Радев.
Пратениците ја поддржаа владата со 124 гласа „за“, 70 „против“ и 36 „воздржани“. Со истиот сооднос на гласови беа усвоени и структурата и составот на кабинетот.
По гласањето, новата влада положи свечена заклетва. Потоа беа интонирани химните на Бугарија и на Европската Унија. За време на химната на ЕУ, пратениците од „Вазраждане“ демонстративно ја напуштија пленарната сала.
Како што и се очекуваше, клучната поддршка за кабинетот дојде од „Прогресивна Бугарија“, која обезбеди 124 гласа „за“.
ГЕРБ, со 36 пратеници, остана воздржан. ДПС гласаше „против“ со 21 пратеник. Против беа и „Демократска Бугарија“ со 21 пратеник, како и „Продолжуваме со промената“ со 16 пратеници. Владата не ја поддржа ниту „Вазраждане“, која во парламентот има 12 пратеници.
Со ова, кабинетот на Румен Радев станува 107-ма редовна влада на Бугарија.
Во своето обраќање пред пратениците, Радев порача дека ќе работи на забрзан развој и модернизација на државата. Тој најави демонтирање на олигархискиот модел, поголема контрола врз управувањето со јавните ресурси и ограничување на политичкото и медиумското влијание.
Меѓу приоритетите што ги посочи се зачувување на мирот, избегнување вовлекување на Бугарија во воени конфликти, борба против сиромаштијата, социјална правда и одржлив развој.
Радев најави и фокус на економски раст, привлекување инвестиции, преструктурирање на економијата, развој на високите технологии и вештачката интелигенција, како и изградба на модерна инфраструктура.
Тој порача дека новата влада ќе работи и на енергетска и прехранбена безбедност, подобри услови за младите, подостапно образование и здравство, како и на заштита на бугарските национални интереси и целосно членство во ОЕЦД.
52-то Народно собрание ја изгласа структурата, составот и премиерот на новиот Совет на министри, предводен од Румен Радев.
