САД извршија напади во Јужен Иран и покрај прекинот на огнот, тврдат дека дејствувале во самоодбрана

Американската војска соопшти дека извршила напади во јужен Иран и покрај тоа што формално е во сила прекин на огнот меѓу двете страни.

Според Централната команда на САД, цел на акцијата биле позиции за лансирање ракети, како и бродови за кои Вашингтон тврди дека се обидувале да постават мини.

Од CENTCOM наведуваат дека нападите биле преземени во самоодбрана, со цел да се заштитат американските сили од закани што, според нив, доаѓале од иранска страна.

Во соопштението се нагласува дека американската армија продолжува да ги брани своите сили со воздржаност и покрај тековниот прекин на огнот.

Иран обвинува за цивилни жртви

Во меѓувреме, иранското Министерство за надворешни работи тврди дека на почетокот на војната, во американски ракетен напад, биле убиени 24 лица.

Според портпаролот Есмаил Бакаеи, нападот се случил на 28 февруари во станбена зона во градот Ламерд. Тој тврди дека меѓу жртвите имало и двегодишно девојче, како и неколку млади одбојкари.

Бакаеи додава дека нападот погодил и спортска сала и дека биле повредени повеќе од 130 лица.

Експлозии во Бандар Абас

Рано утрово, според локални информации, во иранскиот пристанишен град Бандар Абас се слушнале неколку експлозии.

По тоа бил активиран системот за воздушна одбрана. Иранската револуционерна гарда првично спомена три експлозии, но официјално објаснување за причината не беше веднаш соопштено.

Преговорите остануваат во застој

Во исто време, дипломатските разговори меѓу Вашингтон и Техеран и натаму се соочуваат со проблеми.

Американскиот претседател Трамп претходно изјави дека се разговара за конечните детали, но нагласи дека договорот или ќе биде значаен, или воопшто нема да го има.

Од иранска страна, пак, беше соопштено дека постои рамка, но не и конечен договор.

Набргу потоа следуваше информација дека преговорите се соочуваат со застој, а новите американски напади дополнително ја усложнуваат состојбата.

Рубио: Ормускиот теснец мора да остане отворен

Американскиот државен секретар Марко Рубио изјави дека разговорите се одложуваат поради несогласувања околу формулацијата на договорот.

Осврнувајќи се на Ормускиот теснец, тој порача дека САД нема да дозволат негово затворање.

„Теснецот мора да биде отворен. Ќе биде отворен на еден или на друг начин“, изјави Рубио.

Иранските власти засега официјално не ги коментираа најновите американски напади, но државните медиуми ги опишаа како кршење на постојниот прекин на огнот.