(Видео)Катастрофални поплави во Истанбул: Двајца загинаа, улиците се претворија во реки
15/10/2026 10:26
Поплави во Истанбул предизвикаа хаос во повеќе делови од градот, откако силните врнежи поплавија улици, домови и деловни објекти, однесоа автомобили и оставија стотици луѓе заглавени. Во невремето загинаа две лица, а училиштата денеска се затворени.
Обилниот дожд почна во средата и значително се засили во вечерните часови. На повеќе места улиците се претворија во реки, автомобили останаа под вода, а спасувачките екипи интервенираа во текот на целата ноќ.
Двајца загинаа во поплавите
Една од жртвите е 14-годишно дете кое починало откако стапнало во вода во парк во населбата Фатих и претрпело струен удар. За случајот е отворена истрага.
Втората жртва е 34-годишно лице кое, според локалните власти, се лизнало додека преминувало поплавена улица во населбата Ајазага, во Саријер, и удрило со главата во рабник. Подоцна починало во болница.
Спасувани работници и жители
Во Ајазага, спасувачките служби евакуирале околу 200 работници кои останале заглавени во своите работни места поради надојдената вода. Во акцијата биле вклучени пожарникари, AFAD, крајбрежната стража и други служби.
На повеќе места луѓето биле извлекувани со камиони, работни машини и чамци. Поплавите зафатиле и подруми, станбени згради и деловни објекти, а во некои области дошло и до прекин на електричната енергија.
До 242 литри дожд на квадратен метар
Според податоците на истанбулската општина, во Бејкоз биле измерени 242 литри дожд на квадратен метар, во Ејупсултан 190,5, а во Саријер 187,9 литри.
Во повеќе делови од градот количеството врнежи надминало 100 литри на квадратен метар, а локалните власти наведуваат дека станува збор за едни од највисоките вредности регистрирани од 1985 година.
Илјадници пријави до службите
До службите за итни случаи пристигнале илјадници пријави поради поплавени улици, домови и објекти. Уште во средата властите соопштија дека на терен се ангажирани околу 8.000 лица и 2.000 возила и работни машини.
Во поплавите биле однесени и паркирани автомобили, а на дел од сообраќајниците автобуси и други возила останале заглавени во вода.
Затворени училишта, нарушен и авионскиот сообраќај
Властите донесоа одлука наставата во јавните и приватните училишта во Истанбул денеска да биде прекината. На жителите им е препорачано да избегнуваат непотребно движење, особено во близина на водотеци и подрачја со ризик од поплавување.
Невремето го наруши и воздушниот сообраќај. Според турските медиуми, 43 летови кон аеродромот во Истанбул биле пренасочени кон други аеродроми, а неколку летови кон „Сабиха Ѓокчен“ биле пренасочени кон Анкара.
Дел од метро и трамвајските линии кои беа прекинати поради невремето утрово повторно почнаа да сообраќаат.
Силните поплави во Истанбул и понатаму создаваат проблеми, а надлежните предупредуваат дека врнежите може да продолжат и во текот на денот.
Поплави во Истанбул предизвикаа хаос во повеќе делови од градот, откако силните врнежи поплавија улици, домови и деловни објекти, однесоа автомобили и оставија стотици луѓе заглавени. Во невремето загинаа две лица, а училиштата денеска се затворени.
