Костадинов по новата кривична: Сите мои одлуки се законски, имам аргументи и докази

Костадинов по новата кривична се огласи преку Фејсбук и ги отфрли сомневањата за злоупотреба при легализација на објект во Куклиш. Поранешниот градоначалник на Струмица тврди дека сите негови одлуки биле донесени согласно закон и по претходно спроведени процедури.

Реакцијата следува откако СВР Струмица поднесе кривична пријава против Костадин Костадинов и уште две лица.

Пријавата е доставена до Основното јавно обвинителство Струмица.

Костадинов: Подготвен сум да одговарам за секоја одлука

Костадинов порача дека јавната функција носи одговорност и дека е подготвен да одговара за своето работење како градоначалник.

„Јавната функција носи одговорност и јас сум подготвен да одговорам за секоја своја одлука затоа што знам дека сум ја носел согласно законот и по претходно спроведени процедури и постапки“, напиша Костадинов.

Тој тврди дека подолг период неговото име се поврзува со неосновани сомневања и обвинувања.

Според него, нивното постојано повторување создава впечаток дека одговорноста однапред е утврдена, пред да бидат разгледани неговите аргументи и докази.

„Молчењето не значи дека немам аргументи“

Поранешниот градоначалник посочи дека досега намерно се воздржувал од јавни коментари поради почит кон институциите и постапките.

„Таа воздржаност е свесен избор, а не отсуство на аргументи. Својата одбрана ќе ја водам таму каде што се утврдува вистината и се одлучува за одговорноста“, порача тој.

Костадинов побара од медиумите точно и одговорно известување, како и почитување на презумпцијата на невиност.

„Не барам доверба на збор. Барам простор фактите да бидат слушнати и доказите непристрасно оценети“, напиша Костадинов.

МВР го сомничи за спорна легализација во Куклиш

Според МВР, Костадинов и С.Р. (38), тогашна раководителка на Секторот за урбанизам, во 2022 година овозможиле легализација на бесправно изграден објект во Куклиш.

Полицијата се сомнева дека во постапката бил употребен елаборат со невистинита содржина.

Во документите, според пријавата, било наведено дека на парцелата нема објекти.

Документацијата потоа била употребена за бришење објекти во сопственост на Општина Струмица од катастарската евиденција.

Ексградоначалникот на Струмица, Костадинов, заработи нова кривична пријава за спорна легализација во Куклиш

Легализирано стовариште од 161 квадратен метар

Според полицијата, со постапката на лице од Куклиш му била овозможена противправна имотна корист.

Бил легализиран објект со намена стовариште и деловна површина од 161 квадратен метар.

МВР наведува и дека била овозможена постапка за стекнување сопственост врз државно земјиште со површина од 866,46 квадратни метри.

Покрај Костадинов и поранешната раководителка, пријавен е и Ј.П. (60) од Битола, тогашен управител на правно лице кое сега е ликвидирано. Тој се сомничи за „фалсификување исправа“.

Костадинов спомена и закани кон неговото семејство

Во реакцијата Костадинов се осврна и на лицата за кои смета дека намерно му нанесуваат штета нему и на неговото семејство.

Во објавата го спомена и своето новородено дете и порача дека евентуалното свесно нанесување штета нема да го остави без институционален одговор.

Кривичната пријава сега е пред ОЈО Струмица, кое треба да ги оцени наводите и доказите.

Поднесена кривична пријава не значи и утврдена вина, а Костадинов по новата кривична најави дека својата одбрана ќе ја води пред надлежните институции.