Уапсени сегашни и поранешни министри поврзани со трагедијата во Кочани
12/04/2025 12:47
Во рамки на истрагата за трагичниот пожар во Кочани, при кој загинаа 61 лице, полицијата привела неколку високи функционери. Меѓу уапсените се поранешните министри за економија Ваљон Сарачини и Беким Незири, кадри на ДУИ, како и актуелниот министер без ресор и поранешен директор на Дирекцијата за заштита и спасување (ДЗС) Шабан Салиу.
Во групата осомничени е и актуелниот директор на ДЗС, Џеват Селами, кадар на „Вреди“. Според информации од „360 степени“, истрагата се проширува и вклучува уште 23 нови осомничени лица. Деветнаесет од нив се приведени или се приведуваат, додека за еден од нив, Дритон Кучи, поранешен министер за економија и амбасадор на Македонија во Норвешка, се утврди дека не е во земјата.
Полицијата и обвинителството истражуваат можната поврзаност помеѓу Министерството за економија и ДЗС од 2012 година до денот на пожарот во дискотеката „Пулс“. Сите министри за економија и директори на ДЗС, кои биле на чело на овие институции во изминатите години, вклучително и актуелниот директор на ДЗС, се дел од групата осомничени. Актуелниот министер за економија, Бесар Дурмиши, не е осомничен.
Истражните органи продолжуваат со проширување на истрагата, која е во тек.
