Иранската државна радио-телевизија соопшти дека иранската војска испратила ракети кон американски воени бази на Блискиот Исток, прецизно кон територијата на Катар и Ирак. Според извештаи од американски извори, експлозии се слушале над главниот град Доха, како и над Луаил – вториот најголем град во Катар. Наводно, биле истрелани најмалку десет ракети кон Катар и најмалку една кон Ирак.
Иранскиот Корпус на Исламската револуционерна гарда ја нарекол акцијата „Добри вести за победа“ (Beshart-e-Fath), нагласувајќи дека се работи за одговор на американска агресија.
Во нивното соопштение се наведува: „По отворениот воен напад на САД врз нуклеарни постројки со цивилна намена во Иран и прекршувањето на меѓународното право, под надзор на Врховниот совет за национална безбедност и Централниот штаб Хатам ал-Анбија, Корпусот на Исламската револуционерна гарда изврши моќен ракетен напад врз базата Ал-Удеид во Катар – главен центар на американските воздухопловни сили и клучна воена точка на САД во регионот на Западна Азија.“
Во моментов нема прецизни информации за степенот на штета. Освен во Катар, аларми за воздушна опасност биле активирани и во Бахреин и Кувајт.
