Сијарто до Зеленски: „Престанете со заканите кон Унгарија“
25/08/2025 13:28
Шефот на унгарската дипломатија, Петер Сијарто, остро реагираше на изјавите на украинскиот претседател Володимир Зеленски, обвинувајќи го дека го искористил Денот на независноста на Украина за да упати „јасни закани“ кон Унгарија.
Сијарто посочи дека Киев со своите потези врши „сериозни напади врз енергетската безбедност на Унгарија“, нагласувајќи дека ваквите акции претставуваат директно нарушување на суверенитетот на државата. „Војната во која не сме вклучени не може да биде оправдување за кршење на нашиот суверенитет. Го повикувам Зеленски да престане да ѝ се заканува на Унгарија и да престане да ја загрозува нашата енергетска безбедност“, изјави Сијарто.
Претходно, Зеленски изјави дека постоењето на нафтоводот „Дружба“ – кој снабдува и преку Унгарија – зависи од ставот на Будимпешта за евроинтеграцијата на Украина. Тој додаде дека од американскиот претседател Доналд Трамп побарал да го убеди унгарскиот премиер Виктор Орбан да не го блокира членството на Киев во Европската Унија.
Минатата недела, Унгарија беше информирана дека нафтоводот „Дружба“ бил нападнат по трет пат на руско-белоруската граница. Премиерот Орбан потоа испрати писмо до Трамп во кое го информира за украинските напади, а американскиот лидер возвратил со реакција дека е „лут поради случувањата“.
