Притвор од 8 дена за 43 годишниот родител, кој физички нападна малолетни деца фудбалери во Штип
25/08/2025 14:54
Инцидентот на стадионот „Бело Брдо“ во Штип, каде 43-годишен родител физички нападна двајца малолетни фудбалери, доби брза и остра правна реакција – осум дена притвор и најавено судење по скратена постапка. Но, дали институциите ќе реагираа толку експресно доколку јавноста не дигнеше глас?
Реалноста е сурова: токму социјалните мрежи ја раздвижија правдата. Видеата и сведоштвата кои за само неколку часа се раширија на интернет создадоа силен јавен притисок што институциите не можеа да го игнорираат. Илјадници коментари и споделувања ја претворија оваа локална сцена на насилство во национална тема.
Обвинителството отвори итна постапка, а судот веднаш одреди мерка притвор. Но, ваквата брзина е реткост во македонското правосудство – и токму затоа треба да се нагласи улогата на јавниот притисок. Без гласот на граѓаните на Фејсбук, Твитер и ТикТок, многу е веројатно дека случајот ќе беше минимизиран или заташкан како „обичен инцидент“.
