Обвинителството го замрзна имотот на сопственикот на „Марковски компани“ во Македонија и Србија
21/10/2025 13:17
Обвинителството соопшти дека е замрзнат имотот на сопственикот на „Марковски компани“, кој се наоѓа меѓу осомничените за малверзации со тендери во РЕК Битола.
Според официјалните информации, српските власти го прифатиле барањето на македонското обвинителство и му забраниле на осомничениот да располага со десетина нови камиони, сопственост на правно лице од Србија поврзано со неговата компанија.
Дополнително, од Србија е побарано отворање на сеф во банка, за кој е утврдено дека го поседува осомничениот, со цел да се провери неговата содржина.
Замрзнати 30 милиони денари и недвижен имот во Македонија
На барање на Обвинителството, замрзнати се околу 30 милиони денари од сметките на осомничениот и неговата фирма во земјава. Исто така, е побарана забрана за располагање со дополнителен имот, меѓу кои:
три стана во Скопје,
градежна парцела и гаража,
три товарни и едно патничко возило набавени во 2025 година.
Овој имот, според обвинителството, се сомничи дека е прибавен како принос од казниво дело и во иднина може да биде предмет на конфискација.
Осомничениот во притвор
По првичната одлука за куќен притвор, по жалба на обвинителството, судот ја изменил мерката и осомничениот е префрлен во притвор.
„Мерките се преземени со цел обезбедување на докази и спречување на понатамошно располагање со имотот што може да биде дел од кривичното дело,“ велат од Обвинителството.
Обвинителството соопшти дека е замрзнат имотот на сопственикот на „Марковски компани“, кој се наоѓа меѓу осомничените за малверзации со тендери во РЕК Битола.
