Адолф Хитлер оди на нов мандат: „Името не ја определува мојата политика“
25/11/2025 22:46
Необичен изборен момент од Намибија повторно го привлече вниманието на светската јавност: меѓу кандидатите на локалните избори повторно се појавува политичар по име Адолф Хитлер Уунона.
Уунона, 59-годишен советник од централно-левичарската партија СВАПО, важи за фаворит за реизбор. Тој стана меѓународна вест во 2020 година, кога освои 85% од гласовите во изборната единица Омпунца, пренесува Livemint.
Името, иако контроверзно, според политичарот нема никаква идеолошка поврзаност со нацистичкиот лидер. Во изјава за германскиот Bild и BBC, Уунона објаснил дека името му го дал неговиот татко кој „не знаел што претставува името Адолф Хитлер“, додавајќи дека во минатото тоа било распространето германско име.
Тој истакнува дека подоцна во животот сфатил колку е тешко неговото име, но нагласува дека тоа нема врска со неговата политика ниту со развојот на Намибија. Според Euronews, Уунона е познат како долгогодишен борец против апартхејдот и неговите политички ставови се спротивни на идеологијата на германскиот диктатор.
Историски, германското влијание врз имињата во Намибија не е новост. Земјата од 1884 до 1915 година била германска колонија, период обележан со масакри на народите Нама, Хереро и Сан. Германија од 2021 година исплаќа репарации за колонијалните злосторства, но владата на Намибија оваа година одби 10 милиони евра и побара нови преговори.
„Само кога пораснав разбрав што значи тоа име. Јас немам никаква врска со тие идеи“, изјавил Уунона.
