„Супорт Кочани“ бара нови законски мерки: Задолжително лице за безбедност во угостителските објекти
20/12/2025 23:28
„Супорт Кочани“ со конкретни предлози до пратениците: Задолжително лице за безбедност и дигитален пасош за угостителските објекти
Граѓанската иницијатива „Супорт Кочани“ поднесе предлог-иницијативи до пратениците во Собранието со цел унапредување на безбедноста во угостителските објекти низ државата. Иницијативите следуваат по одржаната анкетна комисија на 9 декември, посветена на трагичниот пожар во дискотеката „Пулс“ во Кочани.
Од иницијативата информираат дека предложените мерки имаат за цел системско зголемување на безбедноста, превенција од идни трагедии и јасно утврдување на одговорноста.
– Доставивме предлози за кои сметаме дека значително можат да ја подобрат безбедноста на секој граѓанин. Првиот предлог е секој угостителски објект да има задолжително лице за безбедност, кое ќе биде директно одговорно за спроведување на сите пропишани мерки. Одговорноста мора да има име и презиме, наведуваат од „Супорт Кочани“.
Вториот предлог се однесува на задолжително поставување детектори и сензори за чад и пожар, кои преку интернет би биле поврзани со најблиската противпожарна станица.
– Во случај на појава на чад или пожар, системот автоматски би испраќал сигнал до противпожарната служба, со што значително ќе се скрати времето за реакција и интервенција, објаснуваат од иницијативата.
Како трет клучен предлог, „Супорт Кочани“ бара воспоставување национална дигитална база на податоци за безбедноста на угостителските објекти.
– Секој објект би добил дигитален пасош, преку кој јавно ќе може да се провери дали ги исполнува законските услови, какви елаборати и дозволи поседува и дали е безбеден за посетителите, додаваат од иницијативата.
Судењето за пожарот во дискотеката „Пулс“, кој се случи на 16 март и во кој загинаа 63 лица, а над 200 беа повредени, започна на 19 ноември. Судскиот процес го води судијката Диана Груевска-Илиевска, а сите 35 обвинети физички лица и трите правни лица се изјаснија дека не се виновни.
