Парното во Скопје се пушта од утре, два дена пред официјалниот почеток на грејната сезона

12/10/2026 18:13

Парното во Скопје ќе почне да се пушта од утре, 13 октомври, поради најавениот пад на температурите, информираат од АД ЕСМ.

Иако официјалниот почеток на грејната сезона е на 15 октомври, законските услови дозволуваат испораката на топлинска енергија да започне порано.

Според прописите, греењето може да стартува порано доколку прогнозирана средна дневна температура изнесува 12 степени или помалку.

Од ЕСМ наведуваат дека според податоците на УХМР, за вторник се очекува средна дневна температура од 12 степени.

Со тоа се исполнети условите за предвремено пуштање на парното.

Од компанијата информираат дека интензитетот на греењето ќе зависи од надворешните температури.

Во октомври и во првата половина од ноември, при потопло време испораката може да биде намалена или привремено прекината.

При ново заладување, системот повторно ќе се активира.

ЕСМ апелира корисниците навреме да ги завршат сите интервенции на внатрешните инсталации за греење.

Заедниците на сопственици треба да обезбедат пристап до топлинските потстаници.

Потребно е и редовно електрично напојување, како и подмирени сметки за струја во заедничките простории.

До официјалниот почеток на грејната сезона, АД ЕСМ секојдневно ќе објавува информации за режимот на испорака.

За дополнителни информации граѓаните можат да се обратат на ЕСМ Снабдување на 02 3076 200 и 075 400 100.

За ЕСМ Енергетика достапни се броевите 02 3104 816 и 02 3104 872.

Парното во Скопје почнува да се пушта два дена порано од официјалниот старт на грејната сезона, поради очекуваното заладување.