Панама цврста против кинеска компанија: Правна битка за пристаништата на Панамскиот канал
06/02/2026 13:28
Претседателот на Панама, Хозе Раул Мулино, изјави дека се надева оти тековната правна битка со компанија од Хонг Конг околу управувањето со пристаништата на Панамскиот канал нема да ескалира, но нагласи дека неговата влада ќе остане цврста во одбраната на државните интереси.
„Панама е достоинствена земја и нема да дозволи да биде загрозена од која било страна“, изјави Мулино, коментирајќи ги реакциите и критиките што пристигнуваат од кинеска страна.
Изјавата доаѓа една недела откако Врховниот суд на Панама пресуди дека концесијата што ја држи подружница на компанијата CK Hutchison за управување со пристаништата на Панамскиот канал е неуставна. Одлуката отвори сериозна правна и геополитичка дебата, со оглед на стратешката важност на каналот за глобалната трговија.
Пресудата се толкува и како политичка победа за Доналд Трамп, кој во изминатиот период отворено се залагаше за ограничување на кинеското влијание врз Панамскиот канал. Под притисок на САД, Панама се најде во центарот на поширока геополитичка конфронтација меѓу Вашингтон и Пекинг.
Кина, пак, предупреди дека Панама ќе плати „висока цена“ доколку одлуката на судот биде целосно спроведена. Од CK Hutchison соопштија дека не се согласуваат со пресудата и информираа дека нивна подружница веќе покренала арбитражна постапка против Панама.
Мулино појасни дека додека не заврши формалното спроведување на судската одлука, поморските власти на Панама ќе продолжат да соработуваат со компанијата за да не се наруши функционирањето на пристаништата. По истекот на концесијата, управувањето привремено ќе го преземе локална подружница на данската логистичка група A.P. Moller-Maersk, сè додека не биде распишан и доделен нов концесиски договор.
