Мицкоски од Вашингтон очекува инвестицијата во рудник за антимон од Луке
07/04/2026 16:41
Инвестицијата за антимон од Луке ќе биде една од клучните теми што македонската делегација ќе ги отвори на денешниот Стратешки дијалог во Вашингтон. Ова го најави премиерот Христијан Мицкоски, кој рече дека станува збор за важен проект за македонската економија.
Според него, Македонија е првата европска земја што на вакво ниво одржува Стратешки дијалог со актуелната американска администрација. Делегацијата е предводена од министерот за надворешни работи и надворешна трговија Тимчо Муцунски, а од американска страна прв човек на средбата е заменик-државниот секретар Кристофер Ландау.
Мицкоски рече дека на маса ќе бидат повеќе стратешки теми. Меѓу нив се дигиталната трансформација, вештачката интелигенција, енергетиката, инфраструктурата и соработката во одбранбената индустрија.
Како една од најважните најави, премиерот ја издвои токму инвестицијата за антимон од Луке. Станува збор за експлоатација на реткиот минерал антимон во близина на кривопаланечкото село Луке.
Тој посочи дека истражувањата на терен се при крај. Наскоро, како што рече, се очекува да почне и ископувањето на рудата.
Антимонот потоа би се извезувал во САД. Според информациите што ги добил од инвеститорите, топилницата за преработка би се градела во Оклахома.
Мицкоски оцени дека овој проект може да донесе сериозна економска корист. Според него, станува збор за редок минерал што може многу да значи за македонската економија.
Покрај ова, пред потенцијални американски инвеститори ќе биде презентиран и проектот за „Чебрен“ и „Галиште“. Премиерот рече дека ова е негова лична цел, а министерката за енергетика Сања Божиновска веќе располага со сите податоци за проектот.
Тој откри и дека имал средби со четири компании заинтересирани за инвестиции во дата-центри. Засега не открива повеќе детали, но најави дека ако тие планови се реализираат, ќе донесат голема додадена вредност за економијата.
Стратешкиот дијалог меѓу Македонија и САД се одржува по пауза од четири години. Од владата очекуваат плоден ден, конкретни разговори и заедничка изјава по средбата.
Инвестицијата за антимон од Луке ќе биде една од клучните теми што македонската делегација ќе ги отвори на денешниот Стратешки дијалог во Вашингтон. Ова го најави премиерот Христијан Мицкоски, кој рече дека станува збор за важен проект за македонската економија.
