Орбан до Маѓар: Не ја ограбивме Унгарија, напротив ја зајакнавме земјата

Поранешниот унгарски премиер Виктор Орбан порача дека неговата власт не ја ограбила Унгарија, туку ја зајакнала државата, реагирајќи на обвинувањата од новиот премиер Петер Маѓар.

Во интервју за унгарскиот весник „Немзет“, Орбан рече дека Унгарија влегува во нов политички циклус по изборите и дека десницата ќе мора повторно да се организира во силно политичко движење.

Тој оцени дека изминатите 16 години од владеењето на неговата партија биле, како што рече, најуспешниот период во унгарската изградба.

Орбан: Земјата беше зајакната, не ограбена

Орбан остро ги отфрли тврдењата на Петер Маѓар дека претходната власт ја ограбила државата.

„Маѓар зборува глупости. Националната влада во заминување не ја ограбила земјата, туку ја зајакнала Унгарија“, напиша Орбан и на Фејсбук.

Тој тврди дека во периодот на неговото владеење државните средства биле удвоени. Според него, девизните резерви достигнале историски максимум, а резервите на злато значително се зголемиле во споредба со 2010 година.

Десницата мора повторно да се организира

Орбан порача дека новата политичка реалност бара целосна реорганизација на десницата.

Според него, Унгарија сега има либерална влада и национална опозиција, а задачата на десницата е да ги зачува резултатите постигнати во изминатите години.

„Ние сме тигри, а не зајци“, истакна Орбан.

Тој повика на поголема сила, организација и обнова на политичката структура, од парламентот до граѓанските иницијативи.

Посебна грижа му се младите гласачи

Поранешниот премиер посочи дека еден од најголемите проблеми за десницата е губењето на поддршката кај младите.

Според него, токму помладата генерација силно влијаела врз изборниот резултат.

Орбан смета дека кај младите се менува политичката култура и дека десничарскиот интелектуален круг ќе мора сериозно да го анализира тој процес.

Обвинувања и кон надворешни фактори

Во интервјуто Орбан тврдеше и дека врз изборниот исход влијаеле надворешни фактори.

Меѓу нив ги спомена мрежата на Сорос, Брисел, Украина и мултинационалните компании.

Според него, сите тие имале интерес за промена на власта во Унгарија.

Повик до поддржувачите

На крајот, Орбан порача дека Унгарија влегува во фаза на политичко тестирање и ги повика своите поддржувачи да останат обединети.

Тој оцени дека десницата мора да изгради нов силен политички фронт за периодот што следува.