Еврото се менува: банкнотата од 500 евра исчезнува од новата серија

Европската централна банка потврди дека следната серија евробанкноти нема да ја вклучува банкнотата од 500 евра.

Оваа одлука не е нова, бидејќи беше објавена уште во 2019 година. Сега таа повторно е потврдена како дел од поширокиот процес за редизајн и техничко унапредување на евробанкнотите.

Зошто се укинува банкнотата од 500 евра

Главната причина е борбата против перењето пари и другите нелегални активности.

Според Европската централна банка, со укинувањето на најголемата апоенска вредност ќе се овозможи подобро следење на финансиските текови и поголема контрола врз готовинските трансакции.

Сепак, банкнотите од 500 евра што веќе се во оптек остануваат важечки. Тие и понатаму ќе можат да се користат без временско ограничување.

Се подготвува нов изглед на евробанкнотите

Во декември 2021 година, Управниот совет на ЕЦБ донесе одлука да се развие нова серија евробанкноти.

Во 2023 година беа избрани две можни теми за новиот дизајн. Првата е „Европска култура“, а втората „Реки и птици“.

Првата тема треба да го истакне културното наследство на Европа. Втората има цел да ги нагласи слободата, единството и важноста на заштитата на животната средина.

Во тек е избор на новите дизајни

Во јули 2025 година, ЕЦБ отвори конкурс за европски графички дизајнери.

Крајниот рок за доставување предлози е крајот на април 2026 година. Потоа, жирито ќе може да избере најмногу десет предлози, односно по пет за секоја тема.

Овие решенија ќе бидат доставени до Одборот на ЕЦБ.

Конечниот избор до крајот на 2026 година

Се очекува конкурсната постапка да заврши во јуни 2026 година.

По тоа, ЕЦБ ќе спроведе и јавна анкета, за граѓаните да можат да се изјаснат за предложените дизајни.

Конечниот избор на новите банкноти треба да биде објавен до крајот на 2026 година.

Новите банкноти нема веднаш да влезат во употреба

Иако процесот е веќе во тек, новата серија евра нема веднаш да биде пуштена во оптек.

Од ЕЦБ посочуваат дека ќе бидат потребни уште неколку години пред новите банкноти да станат дел од секојдневната употреба.