Иран ги откри клучните црвени линии во преговорите со САД: Нуклеарната програма и Ормускиот Теснец не се тема за отстапки
26/05/2026 18:19
Иако изминатиот викенд се појавија сигнали за одреден напредок во мировните преговори меѓу Иран и Соединетите Американски Држави, пораките што доаѓаат од двете страни покажуваат дека договорот сè уште е далеку од финализирање.
Американскиот претседател Доналд Трамп порача дека не треба да се брза со постигнување договор, нагласувајќи дека или ќе биде постигнат „одличен договор“, или воопшто нема да има договор.
Во меѓувреме, САД во текот на ноќта извршија нови напади, кои Вашингтон ги опиша како дејствување во самоодбрана. И покрај тоа, според последните сигнали, дипломатскиот процес засега не е целосно прекинат.
Техеран ги постави своите граници
Иранските државни медиуми во последните часови објавија кои се главните црвени линии на Техеран во разговорите со Вашингтон.
Според иранската новинска агенција ИРНА, инфраструктурата на иранската нуклеарна програма не може да биде предмет на компромис. Ова е една од најцврстите позиции на Техеран, особено во услови кога Трамп повеќепати порача дека на Иран не смее да му се дозволи развој на нуклеарно оружје.
Во дел од извештаите се наведува и дека Вашингтон бара Иран да го предаде збогатениот ураниум.
Ормускиот Теснец останува чувствителна точка
Според иранските медиуми, една од клучните точки во преговорите е и статусот на Ормускиот Теснец.
Техеран, како што се наведува, инсистира на признавање на своето право на разузнавачки и оперативен надзор над овој важен морски премин. Иран веќе подолго време заговара одреден облик на контрола врз теснецот во рамки на секој иден поствоен договор.
Важни и блокираните средства
Покрај нуклеарната програма и Ормускиот Теснец, за Иран е од голема важност и прашањето за одмрзнување на финансиските средства што се блокирани под меѓународни санкции.
Особено внимание, според извештаите, се посветува на средствата што се наоѓаат во Катар.
Има механизам за избегнување нова ескалација
Во извештаите се споменува и дека двете страни наводно постигнале сеопфатен механизам за избегнување на нови конфликти, со цел да се стави крај на борбите.
Сепак, и покрај ваквите информации, јасно е дека клучните разлики остануваат отворени и дека токму овие ирански црвени линии ќе бидат меѓу најтешките точки за евентуален конечен договор.
Иако изминатиот викенд се појавија сигнали за одреден напредок во мировните преговори меѓу Иран и Соединетите Американски Држави, пораките што доаѓаат од двете страни покажуваат дека договорот сè уште е далеку од финализирање.
