Партиите повторно на маса за Изборниот законик, спорни гласањето на дијаспората, една изборна единица и финансирањто на партиите

Парламентарните партии денеска се во нов обид да ги усогласат ставовите околу измените на Изборниот законик.

Главните забелешки се однесуваат на гласањето на дијаспората, една изборна единица и финансирањето на помалите партии.

Засега, најголемите несогласувања се околу гласањето на дијаспората.

СДСМ предупредува на можни изборни манипулации

Од опозициската СДСМ велат дека во предложените решенија гледаат можност за изборни манипулации.

Тие обвинуваат дека процесот се турка пребрзо и без доволно гаранции.

„Нема никаква причина за вакво брзање, освен намерата однапред да се отвори простор за изборни манипулации. Наместо аргументи, ВМРО бега од одговор на клучните прашања – зошто инсистира на електронско гласање без соодветни гаранции, зошто граѓаните во дијаспората ги става во ризик од сомнежи за злоупотреби и зошто воведува двојни аршини за гласањето“, прашуваат од СДСМ.

ВМРО-ДПМНЕ прифаќа гласање по пошта

Премиерот Христијан Мицкоски вели дека ВМРО-ДПМНЕ е подготвена да прифати повеќе барања, само да се овозможи гласање на дијаспората на следните парламентарни избори.

Тој вчера изјави дека е сè помалку оптимист дека ќе се најде решение за Изборниот законик.

Според Мицкоски, СДСМ и Левица излегле со радикализирани позиции со цел да не се постигне договор.

„Дел од политичките партии излегоа со сосема радикализирани позиции. Едната беше да се гласа во рамки на Државната изборна комисија со консензус, нешто што за нас не е прифатливо. Тоа е позиција која некој ја поставува за да нема договор“, изјави Мицкоски во Кавадарци.

Тој додаде дека ВМРО-ДПМНЕ е подготвена да прифати една изборна единица и поголем буџет за помалите партии.

„Добро, нека има помалку за нас, а повеќе за нив. За тоа сме согласни. Согласни сме и да има една изборна единица. Подготвени сме да ги прифатиме сите барања на СДСМ и на коалициските партнери на СДСМ. Немаме никаков проблем“, рече Мицкоски.

Од ВМРО-ДПМНЕ посочуваат дека, доколку гласањето на дијаспората не биде електронско, може да се организира преку пошта.

Левица бара една изборна единица и укинување на платеното рекламирање

Од Левица, пак, инсистираат на една изборна единица и укинување на платеното политичко рекламирање.

Тие тврдат дека не се точни изјавите на премиерот Мицкоски дека нивните барања во целост биле прифатени.

„Напротив, нашите барања беа пред сѐ, една изборна единица и укинување на платеното политичко рекламирање и беа одбиени. Во текот на целиот процес за подготовка на Изборниот законик во Работната група, Левица беше конструктивна, целеше кон консензус и имплементирање на препораките на ОБСЕ/ОДИХР“, посочија од Левица.

Евроамбасадорот Рокас бара консензус

Во петокот, евроамбасадорот Михалис Рокас изјави дека законското решение е добро, но дека за него мора да се постигне консензус.

Тој посочи дека ОДИХР и Европската комисија дале позитивна оценка.

„Она што останува да се усогласи се модалитетите. Разбирам дека постојат несогласувања, но чувствувам дека постои добра волја тие да бидат надминати. Парламентарната комисија веќе работи и се надевам дека партиите ќе седнат и ќе постигнат консензус за ова чувствително прашање“, рече Рокас.

Разговорите продолжуваат

Партиите денеска повторно ќе се обидат да ги приближат ставовите.

Сепак, засега остануваат отворени клучните прашања: начинот на гласање на дијаспората, една изборна единица и моделот на финансирање на изборната кампања.

Од исходот на овие разговори ќе зависи дали измените на Изборниот законик ќе добијат поширока политичка поддршка.