Нема договор за Изборниот законик, власта бара опозицијата да се усогласи за дијаспората и една изборна единица

Ниту по денешната средба на координаторите на пратеничките групи нема договор за Изборниот законик.

Партиите остануваат со различни позиции околу гласањето на дијаспората, една изборна единица, отворените листи и финансирањето на изборните кампањи.

ВМРО-ДПМНЕ бара опозицијата да се усогласи

Од ВМРО-ДПМНЕ предложиле опозициските партии најпрво меѓусебно да постигнат заеднички став за сите нивни барања.

Тоа, како што велат, ги вклучува една изборна единица, моделот за финансирање, поплаките и начинот на нивно решавање, како и моделот за изјаснување на дијаспората.

„Сето тоа кое што овие опозициски партии ќе го понудат до нас преку еден пречистен текст на закон, ние тоа ќе го прифатиме“, изјави Бојан Стојановски од ВМРО-ДПМНЕ.

ВЛЕН инсистира дијаспората да може да гласа

Од ВЛЕН велат дека за нив е важно дијаспората да добие можност да гласа.

Според координаторот Беким Ќоку, тоа може да биде преку електронско гласање или по пошта.

Сепак, тој нагласи дека моделот мора да биде безбеден, транспарентен и усогласен со меѓународните стандарди.

СДСМ против модел што отвора простор за малверзации

СДСМ останува на ставот дека не е против гласањето на дијаспората.

Сепак, од партијата се против модел кој, според нив, отвора простор за изборни малверзации.

По денешната средба, СДСМ не излезе со официјален став.

И покрај инсистирањето на новинарите, координаторот на пратеничката група Оливер Спасовски одби да даде изјава и рече дека ставот ќе го изнесе друг пат.

ДУИ: ВМРО-ДПМНЕ се повлече од договореното

Од ДУИ велат дека нема договор за Изборниот законик затоа што ВМРО-ДПМНЕ се повлекло од претходно договореното во работната група.

Координаторката на ДУИ, Рина Ајдари, рече дека партијата ја потпишала претходната верзија.

Според неа, ВМРО-ДПМНЕ се повлекло од две суштински точки по доставувањето на предлогот во Собранието.

„Прво од електронското гласање на дијаспората, барајќи гласањето да се спроведува по пошта“, изјави Ајдари.

Таа додаде дека ДУИ останува на ставот дека на државата ѝ е потребна една изборна единица, но со отворени листи и изборен праг од 5 отсто.

Села бара отворени листи

Претседателот на Албанската лига, Зијадин Села, оцени дека повеќе треба да се разговара за отворени листи.

Тој ги повика политичките актери да прифатат отворени листи, а не само декларативно да зборуваат за тоа.

„Секој политички актер тврди дека е за отворени листи, ама денеска сте сведоци кои се тие актери кои не се за отворени листи“, рече Села.

Левица бара приоритет да биде една изборна единица

Од Левица, кои бараа укинување на платеното политичко рекламирање, велат дека нивниот предлог не бил прифатен.

Пратеникот Борислав Крмов оцени дека приоритет треба да биде договорот за една изборна единица.

Според него, прашањето за гласањето на дијаспората се појавило доцна во процесот.

„Ако околу нешто треба да се ценкаме, да се кошкаме и да се кршат копјата, треба околу една изборна единица, а не унапредување на системот на гласање на дијаспората“, рече Крмов.

Изборниот законик останува без договор

И по оваа средба, Изборниот законик останува без договор.

Главните разлики меѓу партиите се околу начинот на гласање на дијаспората, изборниот модел, отворените листи и финансирањето на изборните кампањи.