Албанија одбила влез на лице кое патувало со функционери на Влен, Ќоку ја нарече ситуацијата апсурдна

09/07/2026 9:09

Албанската гранична полиција одбила влез на едно лице кое патувало со функционери на Влен на граничниот премин „Ќафасан“, пренесе 360 Степени.

Според информациите, лицето патувало заедно со пратениците во македонското Собрание, Беким Ќоку и Аднан Азизи, како и со заменик-генералниот секретар во Владата, Хасим Муртезани.

Едночасовно задржување на границата

Настанот се случил на македонско-албанската граница.

По околу еден час чекање, албанските полициски службеници одбиле влез на едно лице од групата.

Координаторот на Влен, Беким Ќоку, изјави дека не знае зошто воопшто дошло до ваква ситуација.

Според него, тројцата функционери приложиле дипломатски пасоши, а контролата требало да биде рутинска.

Ќоку: Апсурдна и бесмислена ситуација

Ќоку рече дека рутинска проверка, која обично трае неколку минути, за нив траела повеќе од еден час.

Тој додаде дека не добиле објаснување зошто не можат да ја преминат границата.

„Јас, заедно со Аднан Азизи, пратеник, и Хасим Муртезани, заменик-генерален секретар на Владата и неколку други државни функционери имавме работа во Тирана. Кога пристигнавме на ‘Ќафасан’, тројцата бевме со дипломатски пасоши. Она што требаше да биде рутинска контрола која трае само пет минути, за жал албанските гранични службеници нè држеа таму повеќе од еден час без да ни дадат никакво објаснување“, рече Ќоку.

Тој додаде дека на едно лице кое било во друг автомобил му бил забранет влез во Албанија.

Функционерите се вратиле назад

Ќоку посочи дека, откако биле информирани дека на едно лице му е одбиен влез, одлучиле да се вратат.

„Во моментот кога бевме информирани дека на еден од нашите сонародници му е одбиен влез, решивме да се вратиме. Сè уште не разбираме зошто се случи ова“, изјави Ќоку.

Тој ја оцени ситуацијата како апсурдна и бесмислена.