Албанија: Пратениците можеле да влезат во Албанија
09/07/2026 17:39
Албанската полиција: Немало забрана за пратениците од Вреди
Законска пречка имало само за едно лице од придружбата
Директорот на албанската полиција, Скендер Хита, изјави дека на граничниот премин Ќафасан не постоела забрана за влез на пратениците од партијата Вреди, туку законска пречка за едно лице кое патувало со нив.
Објаснувањето следува откако вчера делегација на Вреди беше задржана околу еден час на граничниот премин, иако членовите на делегацијата поседувале дипломатски пасоши.
Тројцата функционери можеле да го продолжат патувањето
Според Хита, на границата пристигнале четири лица, од кои тројца имале дипломатски пасоши.
„Трите лица со дипломатски пасоши беа известени дека можат да го продолжат своето патување. Другото лице, кое беше во нивна придружба, имаше законска пречка и не можеше да влезе во Албанија“, изјави директорот на албанската полиција.
Тој додаде дека тројцата функционери самите одлучиле да не го продолжат патувањето и заедно се вратиле во Македонија.
Полицијата: Вакви случаи има секојдневно
Хита истакна дека не станува збор за исклучителен случај и дека граничната полиција редовно постапува во ситуации кога постојат законски ограничувања за влез.
Според неговите податоци, во текот на 2025 година биле евидентирани 625 слични случаи, додека во првата половина од годинава се регистрирани 425 случаи.
Тој нагласи дека државната и граничната полиција постапуваат исклучиво согласно законските процедури и дека нема причина да се доведува во прашање нивното работење.
Случајот предизвика политички реакции
Инцидентот предизвика реакции и во Македонија и во Албанија. Од Вреди побараа официјално објаснување од албанските власти дали постои забрана за влез за нивните функционери.
Во меѓувреме, претседателот на Собранието, Африм Гаши, исто така побара разјаснување од Тирана, додека според информации во медиумите, во Министерството за надворешни работи се очекува да биде повикан албанскиот амбасадор во земјава, Денион Мејдани.
Случајот се случува по медиумските информации во Албанија дека на т.н. „црна листа“ биле ставени десетици лица кои ги поддржувале протестите против албанскиот премиер Еди Рама.
