„Амнести“ бара истрага за можни воени злосторства во Либан
10/07/2026 19:19
„Амнести интернешнл“ бара истрага за можни воени злосторства во Либан
Организацијата тврди дека во три воздушни напади загинале 24 цивили, меѓу нив и 12 деца
„Амнести интернешнл“ повика на независна истрага за три израелски воздушни напади во јужен Либан, оценувајќи дека постојат основи за сомневање за можни воени злосторства и прекршување на меѓународното хуманитарно право.
Според организацијата, во нападите извршени меѓу 6 и 13 март врз станбени објекти во Тир, Набатија и Иркај, во близина на Саида, загинале 24 цивили, меѓу кои 12 деца.
Извештајот се темели на сведоштва од 15 лица
Заменик-регионалната директорка на „Амнести интернешнл“ за Блискиот Исток и Северна Африка, Кристин Бекерле, изјави дека организацијата има „основани причини да верува“ дека во трите случаи било прекршено меѓународното хуманитарно право.
Извештајот се базира на интервјуа со 15 лица, меѓу кои преживеани, членови на семејствата на жртвите, медицински работници, новинари и локални претставници кои ги посетиле местата на нападите.
Повик за ембарго на оружје
„Амнести интернешнл“ ги повика владите ширум светот да воведат ембарго за испорака на оружје за Израел и да ги искористат расположливите правни механизми, вклучително и универзалната и екстратериторијалната јурисдикција, за истражување и евентуално гонење на одговорните за наводните прекршувања.
Израел: Нападите биле насочени кон цели на Хезболах
Како одговор на прашањата на организацијата, израелските власти соопштиле дека дел од операциите биле насочени кон воени цели поврзани со Хезболах, додека за останатите случаи било најавено дополнително разгледување.
Од „Амнести интернешнл“ наведуваат дека не добиле конкретни информации за трите напади кои се предмет на нивната истрага, особено во однос на целите на нападите.
Според податоците на либанското Министерство за здравство, од почетокот на конфликтот на 2 март, во Либан загинале 4.319 лица, а 12.203 биле повредени.
