Уапсени уште двајца доктори во истрагата за шверцуван ботокс
Претреси на пет локации, меѓу нив и две здравствени установи
Обвинителството соопшти дека истрагата за организираната криминална група осомничена за нелегален увоз, дистрибуција и аплицирање ботокс и филери е проширена со нови осомничени.
Во рамките на акцијата вчера биле извршени претреси на пет локации во Скопје, меѓу кои и две здравствени установи, а приведени се три лица, од кои двајца се доктори.
Отворена истрага против четири лица
Од Основното јавно обвинителство информираат дека, врз основа на досега обезбедените докази, е донесена Наредба за спроведување истражна постапка против четири лица.
Тројца од осомничените се товарат за кривичните дела „злосторничко здружување“ и „повреда на права од индустриска сопственост и неовластена употреба на туѓа фирма“, додека четвртото лице е осомничено за второто кривично дело.
По предлог на јавниот обвинител, судија на претходна постапка при Основниот кривичен суд Скопје на сите четворица им изрече мерки на претпазливост.
Истрагата почна во април
Случајот беше отворен во април годинава, кога Обвинителството за гонење организиран криминал и корупција поведе истрага против 17 физички лица и шест правни субјекти.
Според сомнежите, тие организирале мрежа која нелегално внесувала ампули со ботокс во земјава, по што дел од осомничените лекари ги користеле препаратите за изведување естетски интервенции без законска процедура.
Осомничените во предметот се гонат за злосторничко здружување, повреда на права од индустриска сопственост и неовластена употреба на туѓа фирма, а дел од нив и за кривичното дело „примање поткуп“.
