Проневерени 2.26 милиони евра од регистрации на возила, под истрага шест лица и две фирми

Проневерени 2.26 милиони евра од регистрации на возила, а под истрага се шест физички и две правни лица. Истрагата ја отвори Основното јавно обвинителство за гонење организиран криминал и корупција.

Наредбата е донесена по кривична пријава од Одделот за сузбивање на организиран и сериозен криминал.

За тројца од осомничените обвинителството побарало притвор. За уште едно лице се предложени мерки на претпазливост.

Се истражува проневера на 138,8 милиони денари

Според досега обезбедените докази, случајот се однесува на периодот од 1 јануари 2021 до 20 јануари 2026 година.

Првоосомничениот е сопственик и управител на правно лице од Кучевиште кое вршело технички преглед на возила.

Тој воедно бил и неизвршен член на Одборот на директори на осигурително брокерско друштво.

Обвинителството се сомнева дека присвоил 138.877.419 денари. Тоа е околу 2,26 милиони евра.

Парите, според истрагата, потекнувале од надоместоци наплатувани при регистрација на возила.

Полициска акција во Скопје за финансиски криминал доцна синоќа, штетата над два милиони евра

Лажни извештаи и уплатници

Според ОЈО ГОКК, првоосомничениот изготвувал и доставувал лажни извештаи за наплатените надоместоци.

Извештаите биле доставувани до повеќе надлежни институции и општини.

Обвинителството се сомнева дека биле изготвувани и невистинити уплатници за надоместокот за јавни патишта.

Во истрагата е опфатен и раководителот на станицата за технички преглед.

Тој, според обвинителството, изготвувал и потпишувал фактури со невистинити податоци. Доставувал и неточни извештаи за наплатените надоместоци.

Парите завршувале на сметки на брокерско друштво

Истрагата опфаќа и две лица од Одборот на директори на осигурително брокерско друштво.

Според обвинителството, наплатените средства биле уплаќани на сметки на ова друштво.

Потоа парите биле префрлани меѓу сметките на правните лица. На тој начин биле мешани со приходите од редовното работење.

Дел од средствата, според ОЈО ГОКК, биле употребени и за купување недвижности во корист на правното лице.

Под истрага и сметководител и помошник-директорка во ЈПДП

Осомничен е и овластен сметководител. Обвинителството се сомнева дека внесувал невистинити податоци во сметководствената документација.

Тој поднесувал и даночни пријави и годишни сметки кои, според истрагата, не ја прикажувале реалната финансиска состојба.

Со истрагата е опфатена и помошник-директорката за финансии во Јавното претпријатие за државни патишта.

Според обвинителството, таа била должна да ја следи наплатата и да ги проверува доставените извештаи.

Сепак, постои сомнение дека свесно не ги презела потребните дејствија.

Дополнително, наводно го известувала раководителот на станицата за износите што биле наплатени на сметката на ЈПДП.

За тројца се бара притвор

Осомничените се товарат за „Проневера во службата“, „Перење пари и други приноси од казниво дело“ или помагање при извршувањето на овие дела.

Со истрагата се опфатени и две правни лица осомничени за перење пари.

Обвинителот побарал притвор за тројца осомничени. За еден осомничен се предложени мерки на претпазливост.

Проневерени 2.26 милиони евра од регистрации на возила, според сомневањата на обвинителството, на штета на повеќе институции и општини.