Израел и арапските земји го советуваат Трамп да ги одложи нападите врз Иран
14/01/2026 14:55
Повеќенеделните протести во Иран, предизвикани од драстично зголемените трошоци за живот и длабоката економска криза поради меѓународните санкции, прераснуваат во сè понасилни судири. Неофицијалните проценки укажуваат дека бројот на загинати достигнал најмалку 12.000 лица, додека одредени извори наведуваат и до 20.000 жртви.
Иранските власти се обидуваат да го ограничат протокот на информации преку блокирање на интернетот и телефонските линии, што дополнително ја зголемува загриженоста кај меѓународната јавност за реалната состојба на терен.
Американскиот претседател Доналд Трамп јавно ги повика демонстрантите да продолжат со протестите, најавувајќи политичка поддршка, додека Европската унија остро ја осуди употребата на прекумерна сила и го повика иранскиот амбасадор на итни разговори.
Од регионот, Катар порача дека мирните решенија се клучни за стабилноста на Блискиот Исток, додека повеќе регионални лидери внимателно ја следат состојбата, стравувајќи од пошироки безбедносни последици.
Дали се подготвува воена интервенција?
Според информациите објавени од американската телевизиска мрежа NBC News, израелски и арапски претставници ѝ укажале на администрацијата на Трамп дека иранскиот режим, и покрај протестите, сè уште не е доволно ослабен за евентуални американски воени напади да бидат одлучувачки.
Тие му предложиле на Трамп да ги одложи поголемите воени операции, проценувајќи дека режимот би можел дополнително да се исцрпи со продолжување на внатрешниот притисок.
Арапските претставници предупредуваат дека моментално има ограничена поддршка во регионот за воена ескалација, истакнувајќи дека нападите би можеле да го обединат иранското население околу власта. Од друга страна, израелските претставници, иако ја поддржуваат промената на режимот, стравуваат дека надворешна интервенција во овој момент би можела да ги ослабне протестите што веќе се одвиваат на улиците.
