Трамп: Решението за војната во Украина е близу, САД испраќаат „голема армада“ кон Иран
31/01/2026 0:09
Претседателот на Соединетите Американски Држави, Доналд Трамп, денеска изјави дека решението за војната во Украина е „близу“, нагласувајќи дека САД се приближуваат до договор со Русија, но без да открие детали за неговата содржина.
„Сметаме дека сме многу блиску до договор. Работите се движат во добра насока“, изјави Трамп, без да прецизира какви би биле условите и дали Украина директно учествува во преговорите.
Американскиот претседател се осврна и на односите со Иран, потврдувајќи дека Техеран, според неговите зборови, „сака да склучи зделка“. Сепак, Трамп додаде дека исходот сè уште е неизвесен. „Тие сакаат договор, но ќе видиме што ќе се случи“, рече тој.
Во меѓувреме, Трамп потврди дека САД испратиле голема флота од воени бродови кон Иран, која ја опиша како „голема армада“. Според него, станува збор за значително поголемо воено присуство во споредба со претходно распоредените сили во Карипското Море, во близина на Венецуела.
Овие изјави доаѓаат во период на зголемени геополитички тензии, при што Вашингтон паралелно најавува дипломатски решенија, но и демонстрира воена подготвеност на Блискиот Исток и на глобално ниво.
