Масакр во Канада: 25 повредени, 10 мртви, меѓу нив и осомничената напаѓачка

Најмалку десет лица, вклучувајќи ја и осомничената напаѓачка, се пронајдени мртви по вооружен напад во град во североисточниот дел на канадската покраина Британска Колумбија, соопшти канадската полиција. Во инцидентот се повредени уште 25 лица.

Според информациите, шест лица биле пронајдени мртви во средно училиште во Тамблер Риџ, додека уште две лица биле откриени без знаци на живот во куќа за која се верува дека е поврзана со нападот. Едно лице починало на пат кон болница.

Осомничената напаѓачка била пронајдена мртва од, како што наведуваат властите, очигледна самонанесена рана. Полицијата соопшти дека не постои дополнителна закана за јавноста и дека засега не се трага по други осомничени лица.

Јавно предупредување испратено до жителите преку мобилни телефони ја опишало напаѓачката како „жена со кафеава коса облечена во фустан“. Иако идентитетот е утврден, властите соопштија дека името нема да биде објавено во оваа фаза од истрагата.

Началникот на Кралската канадска коњичка полиција (RCMP), Кен Флојд, изјави дека мотивот за нападот сè уште не е познат.

„Мотивот останува нејасен. Сè уште истражуваме каква била врската меѓу осомничената и жртвите“, изјави Флојд, додавајќи дека истрагата е во тек.

Информациите ги пренесе и Асошиејтед Прес, повикувајќи се на официјални полициски извори.