Иран со порака до ОН: Базите на „непријателска сила“ во регионот се легитимни цели при агресија
20/02/2026 9:55
Иран му испрати порака на генералниот секретар на ОН, Антонио Гутереш, во која наведува дека ќе ги смета базите, објектите и средствата на „непријателска сила“ во регионот за легитимни цели доколку се соочи со воена агресија.
Во писмото доставено во четвртокот се истакнува дека реториката на американскиот претседател Доналд Трамп кон Иран „сигнализира реален ризик“ од воена ескалација. Сепак, од Техеран нагласуваат дека Иран не сака војна, но ќе одговори решително доколку биде нападнат.
„Иран ќе одговори решително доколку биде изложен на воена агресија“, се наведува во соопштението, пренесено од меѓународните агенции.
Во меѓувреме, САД го засилија своето воено присуство во регионот, во услови на зголемени тензии и можност за нови напади врз ирански цели. Минатата година, во јуни, беа извршени напади врз ирански нуклеарни објекти, што дополнително ги зголеми стравувањата од поширока регионална ескалација.
Развојот на настаните внимателно се следи од меѓународната заедница, со апели за воздржаност и дипломатско решение на кризата.
