Бразилскиот претседател Да Силва најави одговор за САД и Трамп со реципрочни царини од 50%

Бразилскиот претседател Луиз Инасио Лула да Силва соопшти дека неговата земја ќе одговори со реципрочни мерки на најавената царина од 50% што американскиот претседател Доналд Трамп планира да ја воведе на увозот на бразилски производи. Тој се повика на нов усвоен закон во Бразил кој ѝ овозможува на владата да преземе пропорционални трговски контрамерки.

Трамп во средата најави дека царината ќе стапи на сила од 1 август и ја образложи како реакција на, како што рече, „нефер трговски односи“ меѓу двете земји, како и на судскиот процес што се води против поранешниот бразилски претседател Жаир Болсонаро.

Според писмото на Трамп, новата стапка претставува значително зголемување од претходно воведената царина од 10% во април, и има за цел да ги коригира трговските нерамнотежи и, делумно, да испрати политичка порака.

Писмото што американскиот претседател Доналд Трамп му го испрати на бразилскиот претседател Луиз Инасио Лула да Силва доаѓа по низа слични писма испратени до околу дваесетина други светски лидери, во кои се најавуваат високи нови царински стапки за извозот кон САД. Меѓутоа, писмото до Лула се издвојува по тоа што директно го поврзува зголемувањето на царините со внатрешната политика на Бразил.

Во писмото, Трамп најавува нова царина од 50% за увоз на бразилски производи како казна за тоа што Бразил, според него, неправедно го гони поранешниот претседател Жаир Болсонаро – долгогодишен сојузник на Трамп. Тој го нарекува судскиот процес против Болсонаро „лов на вештерки“, термин што често го користи и за сопствените кривични случаи.

Како реакција, претседателот да Силва во среда најави дека Бразил ќе одговори со реципрочни мерки, согласно новиот закон кој ѝ дозволува на владата да преземе економски контрамерки против странски трговски санкции.

„Бразил е суверена држава со независни институции и нема да дозволи да биде понижувана од никого,“ објави да Силва на социјалните мрежи.

Објавата на Трамп веднаш влијаеше врз пазарите – бразилскиот реал ослабе за повеќе од 2% во однос на американскиот долар. Дополнително, Трамп ги обвини бразилските власти за наводни „напади врз слободните избори“ и „цензура на слободата на говорот“, алудирајќи на неодамнешна одлука на бразилскиот Врховен суд, со која социјалните мрежи можат да бидат одговорни за содржината објавена од нивните корисници.

Иако Трамп тврди дека Бразил предизвикува трговски дефицит што ја загрозува американската економија и национална безбедност, официјалните податоци на Канцеларијата на трговскиот претставник на САД покажуваат спротивно – во 2024 година, САД остварија трговски суфицит од 7,4 милијарди долари во однос на Бразил.

Во својот одговор, да Силва го демантираше Трамповото тврдење за трговски дефицит, повикувајќи се на официјални американски бројки. Забележано е дека делови од писмото што Трамп му го испрати на Лула се идентични со оние во останатите 21 писмо што ги испрати до други светски лидери во последните денови.

Share on Facebook

Tweet

Follow us

Save