22 години од трагедијата кај Мостар: Македонија се сеќава на претседателот Борис Трајковски
26/02/2026 10:37
Денеска се одбележуваат 22 години од трагичната авионска несреќа кај Мостар во која животот го загуби поранешниот претседател на Република Македонија, Борис Трајковски, заедно со членови на неговиот кабинет и екипажот на авионот.
Годишнината од неговата смрт ќе биде одбележана со полагање цвеќе во Скопје, во неговата родна Струмица и во Ротимље, во близина на Мостар. Делегации од државниот врв, претставници на институции и членови на семејствата ќе положат цвеќе на неговиот гроб на Градските гробишта Бутел, како и на спомен-обележјата во Ротимље и Струмица.
Министерот за надворешни работи и претседавач со ОБСЕ, Бујар Османи, денеска го посети спомен-обележјето во чест на трагично загинатиот претседател во Ротимље.
Трајковски загина на 26 февруари 2004 година кога владиниот авион „Кингер“, со кој патуваше на Меѓународна конференција за инвестирање во Босна и Херцеговина, се урна во атарот на Матиќ Брдо кај селото Хусковиќи, во близина на Мостар. Авионот требаше да слета на мостарскиот аеродром околу осум часот по локално време, а остатоците беа пронајдени 24 часа по несреќата.
Во трагедијата животот го загубија и Димка Илкова-Бошковиќ, Ристо Блажевски и Анита Кришан Лозановска од кабинетот на претседателот, Миле Крстевски од Министерството за надворешни работи, Борис Велинов и Аце Божиновски од обезбедувањето, како и пилотите Марко Марковски и Бранко Ивановски.
Првичната истрага, спроведена од македонските и босанските власти, како причина ги посочи пропустите на екипажот при процедурата за приоѓање кон аеродромот во услови на сложена метеоролошка состојба, густа магла и облачност.
По барање на македонските власти, во јануари 2013 година беше отворена нова истрага, водена од меѓународен тим предводен од Омер Кулиќ. И овој извештај како клучни фактори ги наведе грешките на екипажот и системските пропусти.
Борис Трајковски е роден на 25 јуни 1956 година во Струмица. Дипломирал на Правниот факултет во Скопје во 1980 година, а својата политичка кариера ја градел низ повеќе функции, меѓу кои заменик-министер за надворешни работи во Владата предводена од Љубчо Георгиевски.
За претседател на Република Македонија беше избран во 1999 година и ја извршуваше функцијата до трагичната смрт во 2004 година. Во јавноста остана запаметен како политичар кој се залагаше за дијалог, стабилност и евроатлантска интеграција на државата.
Денеска се одбележуваат 22 години од трагичната авионска несреќа кај Мостар во која животот го загуби поранешниот претседател на Република Македонија, Борис Трајковски, заедно со членови на неговиот кабинет и екипажот на авионот.
